Ellis Island

O ai stât a Ellis Island, la isule dongje New York là ch’a disbarcjavin chei che de Europe a levin tai Stâts Unîts, par parecjâsi une vite miôr di chê ch’a vevin chenti chi: puars, mancul puars e ancje siôrs (ma tancj i puars).
Il museu de imigrazion al è fat ben, in stîl amerecan: a son i stes edificis di chê volte, lis stessis bancjis di len là che la int si sentave a spietâ, lis grisiolis ch’a paravin i impleâts, i imprescj doprâts pes visitis medichis, i jets di ospedâl pai malâts, i camarons pe cuarantene; e une vuide ch’e spieghe dut di brucje.
E spieghe ben, sì, ma e fâs ancje vignî voie di ridi cuant ch’e conte che i migrants a vevin di spietâ ancje cuatri oris prin di podê fevelâ cul uficiâl de imigrazion: jo o vevi a pene fat cinc oris impins in aeropuart, cence podê movimi ni lâ in gabinet, a spietâ di vê il vistât sul passepuart; voglant, di là di un veri, la mê valîs che cualchidun al veve tirât jù de ruliere, e che in volte chei ch’a passavin la dogane a cjolevin sù, meditant s’al fos il câs di puartâle vie o ben di lassâle li.
Ma il percors tal museu al è ben fat, cun tancj documents e tantis fotografiis.
E la ultime e vâl dut il zîr.
Tal 1924 i Stâts Unîts a introdusin cuotis fissis pe imigrazion dai paîs d’indulà ch’e rive masse int; finîts i puescj no son sants: si torne indaûr. E in chê ultime fotografie a son cinc calabrês, i prins in assolût a jessi mandâts indaûr par colpe des cuotis. A son stravuacâts suntun grop di valîs ch’o vin imparât a cognossi ben, chês fatis sù di carton e spali. A àn paiât il viaç a imprest: tornâ indaûr al vûl dî, in plui che pierdi la muse, lavorâ dibant agnorums prin di rivâ a tornâ i bêçs vûts pal viaç.
Al passe il fotograf, ju smire e al poie jù il cavalet denant di lôr. E alore i cinc si tirin sù: si slissin lis camisolis sfreoladis, si comedin il grop de golarine, si passin di buride il pietin tai cjavei no plui inmantecâts, e a presentin al fotograf une ghigne che, se nol è dal dut un rideç, al è pûr simpri un at di braùre. In chês espressions sostignudis, ma ch’a platin une avilizion profonde, e je dute la voie di no fâsi scunî di un destin dispietât e furibont, ma ben di cjolilu in man e di cirî di voltâlu inmò une volte.
E traviers la muse di un calabrês o ai sintût a colp une grande braùre di jessi furlan.

di Gianluca Franco
#1029

1 coments On Ellis Island

  • Al è simpri curiôs pensâ a come che la peraule imigrât e vedi la stesse identiche valence se la si cjale denantdaûr, dulà che e devente emigrât. E cussì dispès no si pensi che cui che al è un, al è ancje chel altri. Cun cheste conte o viodin tornâ a fâ un scjampon in Ostarie il nestri Gianluca Franco, che al costruis une storie piçule dentri une storie grande e al rive adore a scrivi une conte che e je dramatiche, ma al timp stes storiche e sociâl. No vin cjatât la fotografie juste, che si fevele te conte. Ma o crodin che daspò di vêle lete, o rivarês cence dubi a imagjinâle.

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît