Soreli a mont

Pe bande là che il soreli al leve a mont si pandeve une lûs che si faseve fadie a definî. Chel celest, che il cîl si puartâve daûr dopo vê consumade la zornade, si mudave intun colôr cinerin ch’al leve a tocjâ i tets scûrs des cjasis, di li si impiave chel lusôr di un soreli vanzât e disfat, reonât di un arint ch’al lusive impiât, sflandorôs; no si capive di dulà che al  podès saltâ fûr. Une robe che dome le nature e podeve meti dongje e parturî. Un lamp plui tart daûr de mês spalis e comparive la lune, cu la sô musone taronde un pôc smavide pal lusôr restât. In bande, une stelute che e pandeve la sô sudizion burint fûr a lampadis la lûs, par studâsi pôc dopo e par tornâ a impiâsi, francje di sflandôr. Cuant che il cîl si è imbrunît, une ae volte chês altris stelis a scomencin a cjapâ il puest ch’a vevin bandonât te matine, par jemplâ i voi di cui ch’al varès savût ancjemò cjalâ ce che tor sere nus vignive regalât disore dal cjâf.
Par no cedi ae tentazion di robâ une stele, i ài tignût lis mans daûr de schene.

di Marisa Gregoris
#1022

2 coments On Soreli a mont

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît