Il mio zardin

Il mio zardin nol è un zardin tradizionâl. Al è un toc di vert cuntun ort, l’osmarin, la salvie, une vît di fraule, un noglâr, lis palmis e une sise di bos. Però al à une robe che ûs fasarà restâ di clap: une trupe di sbilfs a son vignûts a stâ chenti!
Cumò, no steit a dîmi che no savês ce ch’a son i sbilfs. I sbilfs e son spirts de nature, i fruts piçui ju viodin simpri, nô grancj o podìn viodiu dome cuant che il nestri cûr al devente come chel di un frut, cuant che tu sintis che chei altrîs e àn lis tôs stessis dibisugnis e il stes trimâ di front de vite.
Un pôcs di chescj sbilfs a stan di cjase sot il noglâr e lu tegnin di voli in mût che no s’inmali, parcè che si nudrissin soredut di nolis. Altris a son sot la salvie e l’osmarin. Dongje lis peonis, al è l’asîl par i piçui: li e je simpri une confusion mostre, i cjapieluts blu e ros a son simpri butâts ator, un biel cefâ pes mestris che ur tocje tornâ a fracâju tal lôr cjavut, che il soreli ur fâs mâl e no lu capissin.
Sot la sise di bos al è il centri sociâl e il municipi, in bande a son i magazens par tignî il mangjâ par l’Unvier. Ancje chì e je une famee che vuardiee e e spartìs dut cence fâ diferencis: nissun al ven paiât, nissun al robe.
In bande de sise al è nassût un cocolarut e li i piçui a van a zuiâ dopo cene e lis maris, i paris, i nonos si sentin ta une bancjute li dongje e ducj, polsant, si contin lis robis de zornade.
Sot lis palmis al è a stâ il Sindic cu la sô famee: a son sbilfs ch’a si tegnin une vore in buinis. Lui al met la fasse tricolôr ancje cuant che al va a zuiâ di cjartis cui conseîrs tal centri sociâl. Se a fevelin di politiche lu fasin cence barufâsi o dâsi colpis, che ducj a son impuartants ae stesse maniere. Stant che lis robis a son cussì, no coventin ne judiçs, ne carbinîrs. Cualchi pinsîr, dutcâs, lu àn ancje lôr. Il vecjo noglâr al fâs simpri mancul nolis e lôr a àn tancj piçui di nudrî, che si inçopedisi intor. Cussì o ai pensât di ragalâi un pocjis di nolis, parcè chè a podedin tirâ indenant.
Il mês di Jugn, come ogni an, o fasarin une grande fieste cun dutis lis besteutis dal zardin e a sunâ e vignarà une grande orchestre cognossude in dut il mont. A cjantâ o varin come prime vôs il rusignûl, dopo un scjap di passarins a fasaran il coro cui mierlis e i parussui, il cuc il sincopât, il pic di simpri al segne il timp, lis cialis a sunaran la ghitare e il violin. Lis tortorelis che no àn mai une plume fûr di puest, a tignaran il timp te musiche. Sperìn dome che lis chechis no si metin a checâ come simpri, a àn une lengate lungje tant che une siarpe, come tante int. Il çus, propit parcè che al è il çus, al vierzarà la fieste cuntun discors. Dopo a saran lis ranis a scurtâ dut cul lôr cracâ e a àn reson: ogni volte nus fâs cjapâ une sglonfe, al dîs chê e simpri chê.
Tocjarà fâ in maniere di meti i riçuts ta un cjanton in mût ch’a no vedin di impirâ cualchedun, i cais ju metarin sot la vît li che al è l’umit che ur covente. Li suris non son ben viodudis, i gjats a an pore di lôr: l’an passât a an tirât sù une buine cjoche, i è tocjât propit ai gjats di strissinâlis te tane di tant ch’a jerin plenis. Il puest des magnis al è sù pai mûrs e chel des furmiis dulà chi voi a spacâ lis fruguis.
O varin di clamâ dongje, ancje i sghirats ch’a stan di chê altre bande de strade. Tal imprin a erin plens di braùre, ma dopo che a àn vût bisugne di un pocjis di nolis par vie ch’a erin restâts a sut, par sante scugne, a àn sbassât lis alis. Cumò nus àn in agrât par dut ce che o vin fat par lôr e i tegnin a jessi. In forsit invezit a son lis paveis: no si rive plui a viodi une a svualâ, ma pituradis tes cuessis des fantatis sì.
No stin vê iniment lis lusignis, cuant che il soreli al va a polsâ invezit di insiorâ la sere cu la lôr lûs a si taponin, ancje se o savìn ben ‘là che van a imbusâsi… Sperìn dutcâs che dut al torni a cjapâ  la ande di une volte, cussì  cuant che o fasarin la fieste  us invidarin ducj e o soi sigure che e saltarà fûr une vore ben e che si visareis par agns di cheste robe.

di Marisa Gregoris
#1025

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît