Lupo Manarie e la sorprese dal ûf di Pasche!

A Pasche, dopo vê piturât i ûfs come che i veve dite so Barbe Zuan, a Lupo Manarie no i reste che vierzi i ûfs di cjocolate. E però no ‘nd à nissun! Plui al cjalee te cariole, e plui le viôt vueide!
Oh, puarin, Lupo Manarie, che nol à nancje un ûf di vierzi, o disarês voaltris, ma no je mighe vere! A Lupo Manarie i vuelin ben ducj e i vevin regalât cetancju ûfs di Pasche che al veve jemplât une cariole interie! Pecjât che al jere une vore curiôs e une vore golôs (un curiogolôs, si dîs in chescj câs, che al è diferent di un golcuriôs, che invezit a son che zuiadôrs di balon che a fasin gol cul nâs, cu la cadope, o parfin cul cûl). Ma Lupo Manarie nol zuiave a balon, e al jere curiogolôs: che e je une robe che no si à mai di jessi cuant che si à a cefâ cui ûfs di cjocolate cun dentri une sorprese.
Cun di plui, Lupo Manarie, cu la sô bocje bocone (la famose bocjocone, une vore diferente de cjocobone, ma chi al è miôr no spiegâ masse) insome, lui al meteve in bocje l’ûf di pasche dut intîr, al mastiave e pacjave chei 5-10 minûts, e ve li, che al spudave la sorprese interie, fate e finide (dutcâs, juste un pôc tacadice di cjocolate, ma si pues perdonâlu).
Al reste, che cun cetante velocitât, la cariole si jere svuedade une vore prime di Pasche. E ce vevial spudât fûr, il nestri curiogolôs?
Dal ûf di Barbe Zuan, un surisin (vîf, s’intint).
Di chel de Bibliocheche, un libri.
Di chel di Barbe Crot, un vistît
Dal ûf di sô brût, un dado; e di chel di so madone, un rosari.
Dal ûf di sô cusine, un çoc e di chel di so cusin, une gusele.
Ma a di part che nol veve cjatât nuie che i plasi, lui che al varès dât di mat par sorpresis come une britule, un gjavestropui o ancje dome une pale di stic, il piês al jere che nol veve nancje un ûf di mastiâ e spudâ, propit te dì di Pasche. Al jere disperât… fintremai che no i vignî tal cjâf che se al jere bon di spudâ la sorprese fat di un ûf intêr, al sarà ben stât in grât di fâ il contrari! E ve li, in doi e doi cuatri, si met in bocje une grampe di cuadreluts di cjocolate e une grampade di dut ce che al cjate tal scansel dai strafaniçs: puntinis, clauts, astics, fieruts, fruçons, tocs di plastiche, tapons, picjots, spilis, dadui e cjossui a sbreghebalon! Al rumie un biel pôc, e dopo… PUUHH!
Al spude un ûf di cjocolate perfet. Il sô ûf di Pasche.
Lu met su la vetrine, in bande de panarie e… no lu vierç mica?!
L’ûf al è ancjemò là, a cjase di Lupo Manarie, e une volte che soi passât là di lui e i ai domandât parcè che no lu vierç, savêso ce che mi à rispuindût? «Eh, tant… o sai za ce sorprese che e je dentri!»

di Rafaêl Serafin
Dissen dai Piçui Aiutants di Contecurte, Ricart e Jacum

#1006

3 coments On Lupo Manarie e la sorprese dal ûf di Pasche!

  • Ma se mi prenoti, pal an che al ven puedio vê ancje jo un ûf di Pasche di produzion di Lupo Manarie?

    • Eh… bisugne viodi se cul covid lis leçs lu permetaran. Par cumò e je la ordinance di frediga specifiche e e viete “le uova di lupo manaria”. Viodarin 😀 😀

  • Prin di dut o vuei fâ i compliments ai piçui ajutants di contecurte Ricârt e Jacun par chei lôr biei dissengs a florî i fats de conte. E dopo chel don di nature dal nestri ustîr, intal imbastî lis contis cussi ben cjamadis di fantasie, che mi vignarès di dî che nol mancje tânt al meracul di Cane indula che le aghe si è fate in vin . Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît