Lupo Manarie al fâs une partide di discors

Forsit no lu savês, ma un dai amîs plui granc di Lupo Manarie al è Cane Dell’Uva. Cane e Lupo si cognossin di agnorums e forsit no savês che di spes si cjatin a fâ une partide di discors. E forsit no savês che par fâ une partide a coventin lis cjartis di discors, che Lupo Manarie al puarte simpri cun se. Forsit no savês, che lis cjartis dal discors a son… tropis sono… savêso? E ma no savês propit nuie eh! Cent! Lis cjartis dal discors a son cussì tantis, e difati cuant che Cane e Lupo a zuin, stant che bisugne dividilis miezis par om, no spiete, no par om, miezis par Cane e chês altris par Lupo. Insome… tu ju viodis cu lis cjartis dapardut: tes çatis, tes orelis, in bocje, tal sachetin, su la ponte dal nâs… Insome, un zûc tal zûc, chel di tignî sù il discors.
La partide e scomence cuntun dai doi che al dîs une frase, une robe che i ven tal cjâf, e di li, svelts, une cjarte daûr chê altre, e meti inpins il discors, come se al fos il domino, cu la diference che un al pues ancje cjoli une cjarte za zuiade e lâ indevant cun chê. Cui chel al piert il fîl, o parcè che nol zuie, o al zuie une cjarte che no si confâs, al à pierdût la partide. Ve chi, par esempli, une partide.
Lupo Manarie al à scomençât disint: A lis razis ur plâs la brovade cul muset!
– Mangjâ e murì!
No ûtu?
– Alc al è alc, nuie al è nuie,,,
Pluitost che nuie, al miôr pluitost
– No ûtu?
Ben, o resti…
– Ogni mês si fâs la lune, ogni dì si impare une!
Po si sa po!
– Po no no!
Âstu finît di menâ la viole?
– Tô agne!
Can dal ûe! – … … Ve li, che Cane dell’Uva, a chê cjarte, nol saveve ce rispuindi, al veve cjalât tes trê cjartis che al veve suntune orele (Rangjiti – Ce panole! – Pôc si spint e pôc si gjolt) in chê che al veve sul nâs (Va planc che al è dut un veri!) e intune che al tignive sù cu la code (Dal ridi al ven il vaî) e une altre che al veve tes çâtis daûr (Nol è mai un mâl che nol sedi ancje un ben). Nol jere stât avonde svelt e al veve pierdude la partide! Tu vevis di zuiâ “Ce vitis” lu veve coionât Lupo Manarie, o pûr cjapâ sù di gnûf “Ben, o resti”. Cane dell’Uva, che no si inrabiave mai, al veve tasût, ma al veve zuiade in rispueste un biel “Cuietiti”, cussì, fûr dal discors.
Lupo Manarie al veve rugnât di ridi e al veve segnât il ragjo vinçût.
«Tocje a ti scomençâ la partide», al veve dite. E Cane dell’Uva al veve pensât un moment e pôc par dispiet, un pôc par ridi, al veve tacât cussì: – Bisugne uçâ la manarie par taiâ une fete di salam fresc!
E cumò vait indevant voaltris, tal puest di Lupo Manarie, che al è lât un moment a uçâ la manarie.

di Rafaêl Serafin
Dissen dai Piçui Aiutants di Contecurte
Ricart e Jacum
#1014

2 coments On Lupo Manarie al fâs une partide di discors

  • Lis contis di Rafael su lupo manarie mi plasin pal fat ch’ al torne a meti in place chês tipichis espresions di usance nestre che aromai e van dispierdudis, ” Can da l’ue, no utu, o resti, pluitost che nie al’ è miôr pluitost, e V.I.( gno none disè spess, pluitôst che nie cence polente al’ è miôr polente cence nie). Brâfs ancje i frutins Ricart e Jacun a fâ le piture dal lupo cun chês bielis detulis ator. Lussian

  • No varino migo di lassâsi come cjans!

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît