Lupo Manarie si bute inte panarie

Lupo manarie al è stuf di stâ a cjase. Stuf strastuf e superstuf. Lui al è un lupo di aventure, lui nol è fat par stâ sintât su la poltrone cul gjornâl intune man e il telecomant ta chê altre! Ancje parcè che a nol à mai imparât a lei e cu lis ongolatis boconis che al à nol rive adore a cambiâ canâl e i salte fûr simpri la De Filippi. Cussì al tache a ciulâ di gnervôs e la Bibliocheche, che e je a stâ dongje di lui, e ven a sunâi il campanel e a disi di dut.
«Ce isal?» al domande lui vierzint la puarte.
«Di dut!» i sighe jê.
«Ma di dut ce?» al domande Lupo Manarie.
«Di dut di dut!!!» i sighe inmò plui fuart la Bibliocheche.
«Ma di dut di dut ce?»
«Di dut di dut di dut»… e insome, o vês capît, a van indevant a dîsi di dut fintremai a ore di scûr. Un disastri. E no si pues lâ indevant cussì, sì che Lupo Manarie al decît di vierzi la panarie, cjapâ la rincorse e butâsi dentri, par partî par une des sôs aventuris, che ogni tant a scomencin propite cussì. Si che, al tire vie il scartòs cul pan dûr, un mieç grissin plen di mufe e no i saltial fûr un sacut plen di luvins che al crodeve di vê pierdût.
«Ah po ve, ma o sês chi dentri? Oh, ce content che o soi, amîs!»
«Ben tu!» a rimbechin i luvins in coro.
«Sì, o stoi ben jo, e voaltris, amîs?»
«Cocâl! No sin amîs!»
«Ma no, no! No soi un cocâl… no viodêso che no ai lis alis, amîs»
«Ma ti vin dite che no sin amîs, sturnel!»
«E ma no! No soi nancje un sturnel… ajo miga il bec?! O puarins i miei piçui amîs, no mi cognossin plui» al vai Lupo Manarie.
«Çus no tu capissis nuie!» a vosin inmò di plui i luvins.
«E ma adiriture un çus? Mi tocjarà comprâus un pâr di ocjâi a ognidun di voaltris! Pai amîs chest e altri!»
«Oh nol è nuie di fâ…» si disin i luvins un cul altri «Al è propite un bacalà!»
Ma Lupo Manarie, che come che i disin ducj, al à une buine orele, (ancje se lui nol capìs cemût che a fasin a vêle cerçade), insome, al sint ancje chê dal bacalà e al tache a disperâsi. «O puarins, puarins i miei amîs! A son stâts sierâts inte panarie cussì a lunc che a dan i numars! Anzit, a dan lis bestiis. A ma cumò us cjapi, amîs miei, e us fâs un biel bagno cu la aghe bulint, cussì a tornais come gnûfs!»
No lu vessie mai dite. I luvins, spaurîts, a saltin fûr dal sacut, e rodolant e pirlant a corin vie par dute la cjase! E nie, Lupo Manarie al è ancjemò là, che al cjale sot i mobii, clamant chei che al è convint che a sedin i siei amîs: i lupini!

di Rafaêl Serafin
#1003
Dissen dai Piçui Aiutants di Contecurte Ricart e Jacum

1 coments On Lupo Manarie si bute inte panarie

Scrîf un coment

This site uses Akismet to reduce spam. Learn how your comment data is processed.

Site Footer