Il mus de mestre

Che la scuele e vedi su la cussience la sô part di colpe in mert ai preiudizis cuintri i mus al è un fat. E pûr, a pensâ ben, no je une reson.
Ai fruts che a viodin la scuele come il fum tai voi, che no ur pochin i libris e che no àn passion di studiâ, i mestris ur àn simpri dite mus. Ma no si disial “Al lavore tant che un mus”, di un che nol ferme un moment di lavorâ?
Un trat dai mus, se mai, e je la lôr bisugne di autonomie che, te presunzion de int, e passe par cjavestrarie ma e pues sedi, invezit, segnâl di inteligjence e dignitât che no si sbasse a fâsi umiliâ de scorie.
Nuie di fâ. A un frut che a scuele al tire il cûl indaûr e nol met a bon pro lis lezions, i mestris, cuintri ogni evidence storiche, i àn simpri dât distès dal mus. Che anzit, se “asino” no ur pâr vonde, une variant e je “somaro”, peraule che ur va plui ben, si viôt, par sbrocâ il gnervin.
Tune cuinte de Scuele Elementâr di Listize di une anade subit dopo la Ultime Vuere, si è inmalade la mestre Ghine Faleschini e alore e je vignude une suplente.
Par tant che la Faleschini e jere taiade par fâ la mestre, ben volude, preseade e riveride di fruts e gjenitôrs, la suplente invezit e veve sbaliât mistîr.
“Bongjorno, signora maestra” i disevin lis frutis e i fruts, cuant che a rivavin a scuele, la matine.
“Buongiorno, somari!” ur rispuindeve jê. No spietave di vê par mans un frut cjaviestri, spirtât o sflacjon, par dâi dal somaro, ma ducj i fruts, indistintementri, ju calcolave mus.
Dai vuê, dai doman, i scuelârs a vevin tant ben fate la orele a chel “Buongiorno somari”, che ur pareve fintremai une maniere studiade di saludâ la int. Dome il prin frut di Lelie, une dì, i à pensât sore e al à volût sclarî ben e no mâl la robe, lant a font.
Rivât cjase di scuele sul misdì, “Mame” i à dit a sô mari, “jo no sai parcè che ogni matine la mestre nus dîs di saludâti te e mai il pai.”

di Ivano Urli
#981

1 coments On Il mus de mestre

Scrîf un coment

This site uses Akismet to reduce spam. Learn how your comment data is processed.

Site Footer