Cjasis vueidis

Lis cjasis vueidis, bandonadis, a son come musis cence voi, un cuarp cence cûr. Jenfri lis stanzis picjadis tai mûrs a restin ancjemò lis ridadis, lis cisicadis, i momentds di gjonde, lis lagrimis di cui ch’a i è tocjât di vivi li, come raps di ûe ch’a madressin ta l’ultin soreli di une sierade rivade masse adore, ma ch’a cîr dutcâs di jemplâ di un savôr bon dut ce ch’al cjate sul moment.
Cuissà ce tropis matinis, cul prin glon di cjampane, i barcons si vierzevin e sui lavris de int, come rosis, a sflorivin preieris, par domandâ, par ringraziâ, corais ch’a vagolavin ta l’aiar e tai voi e che il fresc de matine al tignive gjelôs jenfri il grim.
Dai barcons metûts in sfese sul misdì di tantis Istâts, in plene canicule, se si olmâve cualche cristian tal curtîl, la puarte si vierzeve e il mangjâ al vignive spartît cun ducj, ancje cui cididôrs.
Il clopâ de dì ch’a si poiave planc su dut, cul scûr ch’al impiave lis stelis, al faseve polsâ ancje il lavorâ, compagnât dai siums bramâts di cualchi fantate in spiete sul puarton dal curtîl, di chel ch’al podeve deventâ il ben o il mâl de sô vite.
L’Unvier ch’al rivave plen di sgrisui, scjaldâts tal clip de grande cusine, dulà che l’odôr dal mangjâ si sparniçave jenfri ogni cjanton, che ancje i gjats e i cjans si tiravin dongje de puarte a nasâ e a spietâ.
Cjase vecje, scune di siums scunide dai agns, cuissà mai ancjemò, ce tantis robis che tu âs drenti di te e tu bramaresis di contâ, il parcè che ti àn bandonade, il parcê che ti àn lassâde sdrumâ jù, parfin i morârs che tu âs devant a taponin la tô voie di vivi e chê jerbe che a si rimpine sui tiei mûrs come un frut che a si ingrampe tes gjambis de mari par podê lâ tal grim e stâ tai siei braçs.
A ti no ti abade plui nissun. Il to cjant si sfante te ploie, tal nuje dai cûrs inglaçâts.
Ma l’aiar ch’al rive, cuntune soflade al sburtarâ adalt dutis li storiis che ancjemò tu tu clocis dentri i tiei mûrs, par poialis tai braçs di chei ch’a son lassù tal cîl e ch’a tegnin iniment la memorie dal timp.

di Marisa Gregoris
#978

1 comments On Cjasis vueidis

  • Marisa, e jê poiade ju cussi ben che no jê une conte ma une poesie, cuntune veretât nostalgjche che olsaress clamale preiere. Mi à tant plasût, un monument a di chês puaris cjasutis bandonadis, e a ’nd è une vore ator. Lussian

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît