Minigonis

A scuele al è il solito secchione.
Vuê al è te citât stelade a sunâ cu la bande.
Ce bielis che a son lis majorettes…
A àn il vistidut celest cu lis minigonis blancjis.
A son lis unichis che a puedin jentrâ tal grant tronc di pyramide marian cence provocâ scandul.
A san manovrâ ben chel bastonut. A son simpri in alenament.
“Vi presentiamo un numero delle nostre migliori majorettes; hanno fatto un buon allevamento… no… allenamento.”
“Ma ce raze di dordel chel là sul palc… al dîs dome strambolots”. Secchione al pense cussì. Al viôt lis trê che a fasin il numar.
“Un applauso per le nostre Cristiana, Alfreda e Celestina…”
clap clap clap
Finît di sunâ.
Finît il numar cul twirling te citât stelade.
Si va a meti jù i struments tune sorte di magazin. Al è un odôr spaventôs di comut ta chel curtîl.
Secchione si intive in Alfreda e Celestina.
Al cjale Alfreda e lis sôs gjambis lungjis lungjis lungjis.
Al cjale la sô muse spavalde e cuntun alc di androgyn.
Al capìs che jê e pues ve un grant podê su di lui, debil e piçul come che al è. Ma lui le à tignude di voli za altris voltis. A lui Alfreda i plâs. Nol è nie di vergognâsi. E je la etât. E je la nature dal zovin. Lui nol à coragjo di disi nie però.
Al sucêt alc.
Alfreda i da la peraule. I dîs alc. Il mûr al è rot ta chel curtilat plen di odôr di comut. Ta chel curtilat dulà che e je jentrade la biele Alfreda des gjambis lungjis lungjis lungjis.
Secchione al rispuint alc ma dut al mûr alì.

A passin i agns e lui nol va plui a sunâ.
Secchione si domande ancjemò vuê ce che al sarès sucedût se lui al ves continuât chel discors… se lui nol ves vût che pôre… se lui al fos stât plui spavalt cun chê frute de muse un pôc androgyne e des gjambis lungjis lungjis lungjis…

di Checo Tam
#958

Notis. Conte gjavade di SCÛR DI LUNE, KappaVu 2008. Il tronc di pyramide marian al è la glesie bunker di Monte Grisa parsore Triest. Si sa che in glesie no si po jentrâ cun cotulis curtis ma a fasevin une ecezion pes majorettes. La foto che o aleghi e je stade scatade a Vignesie tal març 1982. O scrîf “pyramide” e “androgyn” a pueste, come se e fos une influence dal grêc. Il tiermin “minigonis” nol esist te koinè si ben lu si dopre tal furlan fevelât…

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît