Il sado

Silvio e Rosute a àn fat la cjase fûr dal paîs, dapît de culine. E je une biele vilute e la int e je un pôc invidiose di lôr e dal biel puest.
Lui al fâs il capocantîr par une gruesse imprese che e à cetancj cantîrs ator pal mont, cussì al è dispès in Afriche a controlâ i lavôrs. Di fat al è forsit plui vie che a cjase e la valîs in cjase sô e je simpri pronte. Cualchi volte al sta vie ancje par mês, ma a lui il so lavôr i plâs cussì e ancje a Rosute no i displâs, viodint i beçons che al puarte dongje. No àn fruts, par vie che dopo une fierone che Silvio al veve cjapât pes africhis, lui al è restât sterp e a Rosute no i displasarès di adotâ un frutin, “Cuant che Silvio al si fermarà!“ e pense.
Ogni volte che al torne dongje, Silvio al è dut un tenar cun jê; di sigûr i vûl un ben di vite e al varès voie di restâ a cjase ma al è inmò zovin par fermâsi, al pense. “Ancjemò cualchi an, Rosute, e po mi fermi!“ i dîs ogni volte, prin di partî.
Lis amiis di Rosute, a san che jê e je simpri di bessole e par straviâle a cirin di fâle jessî di cjase ogni tant, ma jê e refude simpri, “Par rivuart a l’om“, e dîs. Lâ a balâ cun lôr po i somearès di fâ un grant tuart a Silvio. “No e poi no!“, e dîs simpri.
Ven a stâi che Silvio al torne dongje e Rosute i dîs che si è inacuarte che il sado daûr de cjase al spant. “Po sei che al sedi intasât, a son dîs agns che o vin fat la cjase e no lu vin mai netât!” al dîs lui. Al sa che li de lôr cjase no rive la fognadure, ma l’impresari lu veve sigurât che cul sado che i veve fat nol varès vût fastidis. “Doman o viôt!” al dîs.
Te matine dopo, intant che Rosute e je fûr a fâ la spese, Silvio si met in vore. Cun no pocje fadie al tire sù il tapon dal sado e al viôt dentri; il sado al è intasât, ma di ce?
Nol crôt ai siei voi, il sado al è plen di preservatîfs e lui, che al è sterp, no ‘nd à mai doprâts. Robis che no i vegni un colp, al si sint a mancjâ e al scuen poiâsi intor dal mûr par no colâ. Al rive nome a sunsurâ: “Rosute, par ce…?” Po, cence disi nuie, al jentre in cjase, al jemple la valîs cun la prime robe che i capite sot man e al partìs.
Nol è plui tornât in Italie.

di Pauli Jacuz
#951

3 coments On Il sado

  • Rosute, Rosute, e je che pareve cussi tant brave frute— bastave sôl n’ e gusiele a sbusa le pontute— par fale contente di un frut o n’ e frute. Lussian

  • Lussian, graciis pal to coment in rime. Ma ise une poesie dal to repertori o ti ise vignude di pet?
    Dut cas la storie e je vere e me le àn contade plui di cincuante agns indaûr. Al è clâr che jo mi soi visât nome dal fat e che nons e dut il contorni a son farine dal gno sac.
    O pensi ancje che in te vite al pues sucedi di dut e cualchi volte il diaul al met la code.
    Forsit a Rosute no i bastave “l’afiet” si e no une volte al mês.
    Mandi.

  • No, No, no je dal gno repertori, me le à ispirade Rosute, e sì i sados jerin rivelatôrs di fase, Vigji clostri lu netave ogni mês e se al cjatave un di plui jerin dolôrs pa puare sposine.

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît