Il barbîr

Si clamave Lelio e al faseve il barbîr a neri…
“No si clamave cussì…”
E finissile di rompi… o ai cambiât il non pe privacy, no? Lassimi contâ a cui che nol sa…
Al rivave tal cjasâl di gno nono, vignint jù di Udin in biciclete o cuntun motorinat. Al veve intor un gaban a ûs Derrick, barete a ûs la coppola tal cjâf e, di Istât, par fâ la cjamese cu la manie curte, i bastave taiâ cu lis fuarpis une cu la manie lungje. Al taiave i cjavei a ducj. Al veve un biel zîr tai
paîs, naturalmentri a neri. Jo e Zorç o jerin canais. No volevin tosâsi a scudiele e o levin a platâsi sul toglât. Lis pocjis voltis che Zorç al è stât becât al à scugnût sintâsi sul scagnut che di norme il nono al doprave par molzi e zac, zac, zac… puar lui…
Lelio al faseve ancje cumierç a neri e al leve, a chel fin, tal marcjât di Vie Volturno: al judave a sistemâ la robe. A disevin che al butave jù des casselis a pueste par fâ in mût che i dessin la robe scarte. Po al jemplave lis sportis e al vignive jù tal cjasâl a fâ barat. Dut a so vantaç… narançs e miluçs macolâts in cambi di buine luianie e palmone! Mê none e jere masse buine fin che une dì barbe Remo (altri non cambiât) al à fat cori Lelio, disintji une par colôr e di chê dì no si è fat plui viodi. Al è muart tancj agns dopo… al sameave un puar pitoc e invezit al jere plen di bêçs. Un classic!
Po ben… ta chescj timps che no si pues lâ ator pe pandemie, mi fasarès comut vê un barbîr che al ven in cjase a tosâmi. Ancje a scudiele… o stoi deventant cuntun cjavon come Napo Orso Capo. E o soi convint che Lelio al varès cjatât ancje la scuse juste par passâ i controi cul so motorinat…

di Checo Tam
#953

1 coments On Il barbîr

  • Ancje Intal gno paîs al rivave un tosepioris che per staronza le deke al slargjave le ativitât ancje sui cristians, par i fruts al doprave une scudiele par nivelâ le crodie craniche, par puar siôr cjossul ch’al veve un cjâf come une coce di ‘suf al doprave le terine indulà che so mari ai dave di cuince al lidrik . Lussian

Scrîf un coment

This site uses Akismet to reduce spam. Learn how your comment data is processed.

Site Footer