Tancj auguris Fedora

Tancj auguris, Fedora… auguris e graciis…
… par la tô voglade di confuart cuant che o scrivevi cun chê machine mieç tren a vapôr e mieç motopic par regjistrâ la prime note de contabilitât. I tiei voi a mi devin confuart e coragjo intun ufici indulà che, vuê come vuê, a si fevelarès di “mobbing”, ma tu tu jeris a li par dâmi fuarce e ligrie (cuant che o lavin a bevi il cafè insiemi)…
par la tô dolcece intant che tu i davis la tete a Cristiana, fevelantmi cui tiei mots dal miracul de maternitât…
…par lis nestris venturis di “frutatis di confin”, ai passaçs di Sant Andree e Cjase rosse, mete des nestris incursions a proviodi benzine, cjar e spagnolets: e cetant ridi cuant che intun confin nus mandavin indaûr par vie che o vevin masse robe, plui dal permetût, e nô, ligjeris, o passavin trionfantis par chel altri…
… aes nestris confidencis reciprochis, cualchi volte avilidis, altris invezit di sbacanâ par dut chel che a ti cumbinavin propit come dôs fantaçutis bintaris…
… aes nestris seradis a teatri, vivudis simpri cul entusiasim par la braùre dai atôrs e des atoris che, a cjalâju par television no podevin nancje sumiâsi trop brâfs che a jerin, invezit stant a li sot dal palc de sene…
… aes tôs telefonadis cuant che tu “percepissis” che il nivel di sopuartazion par une femenute di un pensionât cence padin e un tic masse vivarôs, al va sù sù adalt inte scjale Richter (mica inta che Mercalli, no veh)… ben tu tu sês a li e tu capissis il grât sismic che mi fâs scjassâ e a plancut tu lu fasis deventâ cuiet splanant la robe, gjavant un pôc l’impuartance…
… aes nestris contis di nonis, che o sin, di maris che o sin e o sin stadis, di fantatis ch’o jerin, di frutis che o forin: a la fin lis nestris storiis nus fasin sintî come dôs sûrs par dut chel che di une al jentre inte infanzie di chê altre.
… graciis, in struc, par la part positive che di te e je inte mê vite e, a la fin, ancjemò auguris fantastiche FEDORA, AMIE al grât plui alt ch’al sedi!

di Barbara Battel
#945

2 comments