I tratôrs

Ma parcè tratôrs? Jo ju ai simpri clamâts motôrs. In campagne no jerin altris mieçs a motôr se no i tratôrs e cussì, tai agns ’50 e ’60 al è capitât come pai morârs che a son deventâts sinonim di arbui cualchi secul prime…
Il motôr. Bepi al voleve un Lamborghini ros parcè che i plaseve cussì ma a la Lamborghini i àn dit che lôr ju fasevin dome blancs.
“Cjol un Carraro e no stâ a rompi! Chei ju fasin ros…!”
Cussì i vevin dit. Ma barbe Remo lu veve sconseât. Seont lui i Carraro a jerin delicâts. E alore? Oh, tu cjatavis di ogni! I Fiat narançons, i Ford blu, i Deutz verts, i John Deere verts ma cui cerclons zâi, par no confondisi, i Mc Cormick ros scûr, come i Case International, i Landini blu un pôc plui clâr rispiet ai Ford, i Agrifull verdulins, i Same ros… e si podeve continuâ e si podeve ancje fâ une ricercje su la divignince dai nons. Nissun bifolc si sarès mai insumiât che Deutz al fos un non di derivazion latine… la citât di Deutz (pron. Doiz), di dulà che e ven la fabriche, le vevin fate sù i Romans 2000 agns za fa e le vevin clamade Divitia (pron. Divizia) ven a stâi bondance. Po i todescs a vevin strupiât il non. Va be… al è just che lu savedis…
Insome il nestri Bepi a la fin si jere decidût. Al jere tornât a la Lamborghini e, rindintsi, al veve comprât il tratôr blanc. O miôr, il motôr.
Trente ratis, paiadis lant a vore par tancj altris parons e spes trascurant i siei cjamps. Lu veve sfrutât ben e no mâl chel motôr e al veve resistût benon ma une dì so fi lu veve cjapât sù par fâ un ninin di alenament. Cence che al sepi il pari al jere lât in campagne e, distrat di un fasan, si jere ribaltât intun fossâl. Muart vitim a disesiet agns!
Bepi si copà pe disperazion lant sù intun pilon eletric. Sfulminât! E pûr… a bastavin cinc ratis in plui par vê il stes tratôr cu la cabine e ta chel câs forsi il fi si salvave…

di Checo Tam
#935

3 coments On I tratôrs

  • Pingback: CoroneCurte! | Contecurte ()

  • Achì o vin la solite conte dal Famei dal sabide di sere. Une di chês che i plasin une vore al vuestri ôstîr, par che a tachin cuasi come un toc di enciclopedie rurâl de vite di une volte e dopo a cambiin direzion cuant che mancul tu te spietis, su tintis dark che nancje i miôr Cure… insome: dute di gjoldi, o cuasi, cheste conte che e fevele di tratôrs!

  • Tu disis tu Checo ma lis palanchis in chei agns jerin raris come lis moscjs blancjs, e se daûr dal ” MOTÔR ” si podeve strisinâ il vuargenon cence gabine, cussi che vadi. Intai agns cincuante finît le cuinte “alimentâr” a cura l’ort de mestre, mi inviarin a fâ il garzon intune farie di paîs , intes zornadis di ploie le farie e bondave di contadins a di la lôr sul gnûf tratôr rivât in paîs, al jere un OM, podeis sôl crodi, o par invidie o ignorance ducj lu contestavin, “un motôr parsore il jet de blave MAI” – ” le vuargine e va masse sot e bute fûr il salvadi” ” i fumps dal petrolio Scombussulin le samence” e vie ind. Sta di fat che in chei agns plui che fa le sielte in base al colôr vignive scartade addiriture le utilitât dal imprest, naturalmentri al jere cence gabine , e costave masse, e dopo si insîst “cont. cervello fino. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît