Si clamave Bastian

Si clamave Bastian. Anzit, lu veve clamât Bastian! So pari. E di cognon al faseve Contrari. Ce schifo di non, al veve simpri pensât. Ma al jere un tipo trancuil.
Al tignive a bas volum, come in sotfont, il sintiment polemic che al nudrive par so pari. La mari, mancjade ae so nassude, no le veve mai cognossude.
La vite di Bastian Contrari e jere trancuile ancje chê. Dopo un periodi di scuele cence sorpresis, vivût cu la rassegnazion e la docilitât di une vacje passude, al jere vignût il moment di sielzi ce fâ di se. E Bastian al veve sielzût cence fâsi masse domandis la strade che i varès dât un avignî miôr. Votâ? Nol votave. E se al votave al votave come la plui part di chei che i ziravin intor. Aspetativis pe vite? Une femine, doi fruts, un apartament in campagne, une biele machine grande. Al stave daûr al balon cence masse passion, plui par vie che i plaseve lâ cui amis al bar a viodi la partide. No si sintive speciâl, si sintive normâl e al jere content cussì. Nissun dai so amîs i veve mai dât dal conformist – al jere di dubitâ parfin che la cognossessin, chê peraule.

Al murì, ancje, come la plui part de int, ven a stâi par vie di un infart. A jerin trê di dopomisdì di un lunis cuant che un grum di sanc dûr al le a ingolfâ la arterie che e rivave al cûr di Bastian. Intant che al sucedeve un davoi dentri dal so cuarp, e lui al tacave a sintî come un pês tal pet, propit in chel moment Bastian al pensà a so pari. Insom al jere stât un bon om, cun dut che no si jerin mai capîts. Forsit e jere ore di perdonâlu, prime di dut par chel stupit non che i veve dât… cuissà ce che si spietave di lui.
Al è tipic, no?, rivâ insom de vite e pensâ dome in chel moment ai rapuarts di comedâ, ai obietîfs ancjemò lontans o – piês! – al fat di vê rinunziât a otignîju.

Bastian al murì bessôl e di conformist, cemût che al veve simpri vivût. Insom lu veve simpri savût. Ce che nol veve pensât al è che al vivi di conformist clamantsi Bastian Contrari… al jere propit di bastian contrari!
Cuissà ce che al varès dit so pari.

di Margarite Cogôi
#917

 

2 coments On Si clamave Bastian

  • Ah… di sigure lu cognosês, un come chel ca di cheste conte, de nestre Massarie​. O magari no propite come chel de conte, ma cuissà… I vûl provât a leile cun atenzion, par capî di ce bande che e va a distirâsi cheste storiute: se plui de bande de ironie, o magari se al è alc sot cuintri il conformisim che al devente anticonformisim e al torne conformisim. A voaltris il judizi!

  • Metint in sume le vite di Bastian sie pûr inte alte sonance dal non e cognon , no al à mai rot i tabars a di nissun, mitint a tasê non e cognon che lu batiarin, dopo no sai se al ultin moment al jere in acuardi cun chel grop di sanc a stropa le autostrade de vite . Lussian

Scrîf un coment

This site uses Akismet to reduce spam. Learn how your comment data is processed.

Site Footer