Furlans intal forest

O jerin intun paîs african, il gno om, il nestri piçul di nancje doi agns e jo… O jerin alì pal mâl dal modon: la cjase e veve bisugne dai sieraments parcè che nissune bancje e deve il mutui a cui che nol veve nuie. Il nestri mont furlan lu puartavin dentri il cûr e nol jere facil parâ ju lis bocjadis di marum e dolôr che cierte int e veve dome par nô. Cul nestri piçul o fevelevin furlan e inte “cjase” li che il paron dal cantîr al veve proviodût pal gno om (pantianis che nus cjaminavin sul jet di gnot). Di là dal mûr in bande, o scoltavi a fevelâ umigns cun diviersis cadencis. Cuant che o vin començât a fâ cualchi peraule, riduçant, un di lôr mi ’ndà contât che a vevin fât insiemit une scomesse di indulâ che o rivavin, su la nestre divignince parcè che il nestri fevelâ no rivavin ni a capîlu e ni a voltâlu. La plui part di lôr e veve pensât e scometût che o vignivin de Barbagje e duncje de Sardegne! I ai contât che o sin furlans e pal timp che o vin vivût cussì dongje a son stâts di une gjenerositât e gjentilece maraveose. Parincj, par talian, al fâs rime cun sarpints ma int, si ben che no cognossude ma di cûr, e sa dâ cul cûr, ancje gjavantsi il pan di bocje, par la anime buine che e je di cjase dentri di lôr. O puartarai simpri intal cûr ognidun di lôr, int foreste taliane ma ancje arabe che a nus àn judâts e fât sintî volûts ben come in famee (come intes fameis di sest…)

di Barbara Battel
#926

2 comments On Furlans intal forest

  • E vie, cu la prime conte de setemane, che nus lasse la nestre Contecurtare plui prolifiche, che come simpri nus conte robis di ogni dì, cun semplicitât e simpri plenis di bogns sintiments. Achì nus conte di une sô esperience intal forest, che nus fâs resonâ su cemût che al è cjalâ lis robis di chê altre bande, ogni tant.

  • La educazion cun ducj i siei ordins, se usade come si devi su di ogni persone dal mont, e dà i siei fruts in bon acett e comportament, culì Barbara lu dimostre . Confermi che il vecjo proverbi notificât di Barbara purtrop si cjate come il corona virus, cence vacin, dificil di scombati. Lussian

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît