2020, 905, 10000, 2200000… O stin dânt i numars!

Mandi a ducj, letôrs di Contecurte! 
O varês viodût che la Ostarie, cul tacâ dal 2020, si è cjapade cualchi zornade di polse cu lis publicazions… E o scometìn che cualchidun al si sarà domandât… Parcèèèè? E magari cualchi canaie al varà pensât che o sin dai sflacjons. Cheste ultime robe, e je sigure une veretât, ma no sin stâts cu lis mans in man, soredut par chel che e rivuarde l’Ostîr e la Sartore.

L’Ostîr, profitant di vê finît lis contis frescjis, al à metût man al Camarin, une vore plen e disordenât, e al à tacât a rabaltâ fûr su dut e meti a puest l’archivi des contis. Un lavoron che al larà indenant tai prossims dîs, ma che al à permetût di rivâ bielzâ a cualchi risultât e scuvierte, sedi sul undicesin an di vite de nestre Ostarie, nassude ai 16 di Zenâr dal 2009, sedi sul ultin an di contis e Spetacui.

Sêso curiôs? E alore tachìn a dâ i numârs!

La ultime conte publicade su la nestre Ostarie ai 31 di Dicembar e je la conte numar 905! Di no crodi, vere? L’ostîr al à numerât une a une lis contis, e planc a planc, a partî dal 2009, al larà a meti il numar e a gjavâ un pôc di polvar, magari comedant la imagjin o cualchi falope dulà che i cole il voli. Us pues za dî, che l’andament des contis – tai undis agns di vite de osterie – al è chest:

• 2009: 95 contis di 25 autôrs diferents
• 2010: 56 contis di 20 autôrs diferents
• 2011: 48 contis di 18 autôrs diferents
• 2012: 61 contis di 17 autôrs diferents
• 2013: 65 contis di 18 autôrs diferents
• 2014: 84 contis di 17 autôrs diferents
• 2015: 110 contis di 19 autôrs diferents
• 2016: 129 contis di 30 autôrs diferents
• 2017: 63 contis di 16 autôrs diferents
• 2018: 64 contis di 21 autôrs diferents
• 2019: 130 contis di 32 autôrs diferents
• 2020: ?

Periodis di magre e di gjonde, insome, cun cualchi an dulà che e je stade cualchi polse plui lungje dal solit. Spes al è stât par i lavôrs di manutenzion, stant che o vin cambiât trê buteghis: Splinder e Blogspot, in afit di rive jù; e cumò o paìn un afit regolâr e o sin parons di cjase nestre, achì su www.contecurte.eu.

Cualchi altre polse, magari, e je stade par i timps e lis lunis dal Ostîr, che o savês, nol è propit un che al è bon di stâ cuiet e nancje un tant facil di tirâ a ciment. Ma bisugne dî che la gjestion, cambiant come che al è normâl che al sedi, il personâl e il menù, e je stade simpri in fidance dal prodot tipic che nus à sburtât a nassi: la CONTE CURTE. Par chel, e i numars nus confuartin, o confidin che il 2020 al sedi propit l’an che o rivin adore a meti sù LA CONTE NUMAR 1000! 
Ven a stâi, contecurtârs e contecurtaris, cumò che o sin di gnûf in vierzidure, daisi da fâ e vie, fasìn che il 2020 al sedi un an di abondance!

Ancje parcè, simpri lânt indenant a dâ i numar, us dîs che o vin publicât, cjacarant dome di contis, la bielece di plui di 450.000 peraulis e cirche 2.200.000 batudis! (plui o mancul 15 libris luncs tant che Bisest)
Par cui che al à passion di numars, la medie di contis publicadis a d’an e je di cirche 80 contis, par un numar di caratars di circa 2.400 par ogni conte (41.000 peraulis ogni an). L’ostîr al è ancjemò daûr a tamesâ il materiâl, ma i pâr za di podê afermâ che i gjenars plui doprâts a son chel ironic e chel che noaltris o vin tacât a clamâ romantic (che o intindin un pôc ce che in inglês si clame “mainstream“, ven a stâi un spieli vonde larc di sfumaduris. Avonde rapresentadis, ma o savin che e je colpe di ostîr e famei, la fete des contis di gjenar fantastic.

E come autôrs cemût sino? Ve chi, che o vin un pôcs di dâts di devant e daûr dal bancon! In chescj undis agns o vin vût la bielece di 77 autôrs difererents (su la cjarte) ancje se o vin di marcâ une presince avonde gruesse di autôrs che o savin no jessi personis esistentis ma pseudonims e che par solit a mandin dome une o dôs contis e dopo a sparissin tal inniò. (Anzit, chest vergognâsi di meti il non o sielzi un biel sorenon cence platâ cui che si è, al sarès dut di studiâ) A gjavâ chei li, che a son une grampade, o sin in ogni câs sui 70 autôrs, che nus somee un numar di no butâ vie, stant trop che al è stitic il mont di cui che al scrîf par furlan.

I numars dal top contadôrs, invezit, a marchin doi di lôr che a àn di scugnî sei lassù par lavôr, che a son il Famei, Checo Tam, cun 87 contis, e l’Ostîr, cun 85. Ma daûr no di masse al è Nello Malisan, che a nus plâs pensâ che al sedi deventât un scritôr di contis seriâl par cause nestre. Nello al à ofrît la bielece di 74 contis, contant ancje chês scritis a miezis cun altris. E subit daûr a son altris che o vin di dîsi dome graciis pe costance e dedizion che a àn dediât al nestri progjet: Pauli Jacuz e Galliano di Buenos Aires, cuntune biele 50ine di contis, Jaio Furlanâr (46), Barbara Battel (45), Laurin Zuan Nardin (40) e Bepi Zefon (31).
A zirin ator de ventine di contis, altris come Plume di Ingjustri (20), Luciano Marinig (20) il Passadôr (19), Milio dai cjans (19), Massim Furlan (18), el fari (16) e in gracie de ativitât dal Ostîr tes scuelis o vin ancje 16 contis scritis di fruts.

Discors che nus puarte dentri tal cantin des dificoltât de Ostarie. La prime e je propite chê di no rivâ a tirâ dentri int zovine che e scrivi. Lu savin che la colpe no je nestre, parcè che intun popul dulà che une lenghe no ven insegnade ni di gjenitôrs, ni de scuele, nol sarà sigure un sît internet a cambiâ lis robis e a fâ scrivi intune lenghe di pôcs. Ma o cjapin at de etât medie alte dai nestri contecurtârs e cirarin di fâ alc.

Altri cantìn che nol ingrane, in ostarie, al è chel dai coments, che a son simpri pôçs e che no corispuindin a lis leturis. Achì, forsit, no si pues nancje viodilu come probleme, tal sens che un che al lei une conte nol à masse ce scrivi e insome… al è come un che al bêf un tai, che nol à mica di scugnî dî cemût che al è. Al sarès però biel che si rivàs a sparniçâ di plui il verp de conte curte, magari condividint su fb lis contis, robe che, ogni tant, no fasìn nancje nô di Contecurte cu lis nestris contis. Ma i furlans no àn timp, lu savìn, no si pues fâi une colpe. Il top comentadôr, in ogni câs, al è Lussian di Varian, che al è un plasê viodi il sô coment rivâ puntuâl e delicât a ogni conte.

Altri? Sì!
Il 2019 al è stât un an di gracie. O vin publicadis tantissimis contis e soredut di tancj autôrs diferents e cun ben 7 autôrs gnûfs (4 feminis e trê oms). Ma no dome chês: o vin publicât conseis di scriture e cualchi consei di leture cun i Lets in ostarie e soredut al è stât l’an dai Spetacui. Mai come tal 2019 si sin impegnâts a puartâ ator lis contis dal virtuâl al reâl, cun spetacui simpri plui in teme e struturâts (la Briscule des Striis, la Disfide dai Dadui, la Briscule dai Sants, il Conte Curte day “dîs dîs dîs”…).

Par chel o vin par voaltris une altre gnove. La nestre Sartorie e à cjapât in man dut il materiâl dai Spetacui di Contecurte e e sta metint adun une maraveose gnove pagjine cun dentri une vore di materiâl di podê cjatâ, lei e scjamâ. E ta chê gnove pagjine o cjatarês za la date dal prossim Contecurte Day… scjaldait lis tastieris!

Finide chi?
Ma no! O vin ben altris ideis che nus passin pal cjâf. Une e je chê di cjatâ une altre maniere par coinvolzi i contecurtârs a scrivi su comission. L’an passât e je stade la cjatade dai dadui des contis, che dopo, in version contecurtiche, si son mudâts in Cjarticontis.
Chest an o vin voie di cjatâ alc altri par stiçâ a scrivi e invidâ te Ostarie. Da rest, un locâl che nol fâs marketing nol pues vê masse sucès.

E cun di plui, l’Ostîr, in combute cu la Sartore e cu la Coghe, al à voie di fâsi lavorâ di bessôl e regalâ alc ogni mês ai contecurtârs plui fidâts e ai clients plui afezionâts… Insome, stait in vuaite che in curt o varin plui di cualchi gnove.

E no vin finît! Di doman o tachin lis publicazions e ce fasino? O vin metût a puest ancje la cantine, gjavât lis telis di rai e cjatât scjatulis che no savevin nancje di vê. A jerin contis metudis in bande, une volte, ma cumò a deventaràn contis di meti sù! E fra di chês o podìn anticipâ che o vin cjatât une grampade di contis dal nestri Famei, che lui nus veve mandadis di riserve (President Reserve Riccadonna, come che nus dîs lui) e ancje une grampe di Storiutis de buinegnot, che cualchidun si visarà, a son di Ivano Urli e che nus à dât il permès di doprâ. Ven a stâi che ogni fin setemane, par cualchi setemane, o varin chestis contutis. La sabide par visâ che il famei al è in radio, su Radio Onde Furlane, cu la sô Indigo; la domenie par saludâ la setemane cuntune contute de buinegnot.

Al è vonde, o disarès. Se o sês pronts par un super an contecurtic, lassait un coment che o vin gust di sintîus!