La contentece

Enio Caisâr al è stât pal mont di frut in sù. In fornâs, di siet vot agns. E tes minieris di cjarvon, di grant. Cence contâ la cumbinazion di lâ pal mont che in zoventût la puare int e à vût in timp di vuere.
Za in etât, al jere stât a vore in feriere pes Gjermaniis.
Une sere, o sin dute la parintât te arie a scartossâ un grum di blave, tun legri svoletâ par aiar di panolis e peraulis di int in vore.
O jeri frut. Jenfri une glagn di sium, o sint gno barbe Enio che al conte de Gjermanie.
“Barbe” gjo, “âstu imparât a fevelâ gjermanic in Gjermanie?”
Cuntune panole in man, lui mi cjale un moment sorepinsîr. Po al segne cu la panole mê none Miane che e veve passade di un pieçut la otantine.
“Disi a Miane li mo” dissal gno barbe, “che a provi a fevelâ todesc!”
Al veve patidis tantis pe sô strade. Al veve vût ancje i siei biei moments. Nol à mai pierdût il gust di gjoldi des tantis minusaiis de vite.
Za vieli, al zuiave di cjartis un dopo cene su la taule cun Milie che i tignive companie. La partide e jere stade tirade fin tal ultin, cjapant e molant in sorte ce che i vignive sù.
Contâts che al à i ponts e vinte fuarce di vitis la partide, la fie lu viôt content ridi di cûr. E po poiâsi su la taule tun grumut, cul mac des cjartis ancjimò in man.
Al jere muart di contentece.

di Ivano Urli
#911

1 coments On La contentece

  • Une conte che di miei di cussi no si po fâ dissen miôr dal nestri Friûl, no à dismenteât nissun colôr. In chei radunos di lavôrs, scartosà, lis filis intes stalis, i vielis si spiticavin a contâ i lôr sacrificis, e nô frutins a scoltajiu a bocje vierte, di chi puescj ulì e scomençave le nestre prime lezion di vite. Biele conte, covade in timps indulà che il dûr e pôc de vite al compensave a tignî alt il spirt. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît