La Conte dal Mês di Zenâr

La vin cumbinade!

Ugnot passade, pôc prin di miezegnot, la Conte dal Mês di Zenâr e je partide e e varès di jessi rivade tes casselis de pueste di ducj chei de Liste di Contecurte!

Al jere cualchidun che si jere iscrit e ma che nol veve confermade la iscrizion fracant il leam te mail (cjalait tal spam), e cualchidun che al si è iscrit propit pôc dopo vê mandade la conte. No stêt vê pôre, usgnot Astrid, la nestre eficientissime Sartore che nus taie e cûs il sît, e che e à metût adun ancje il pdf, si visarà di mandâ il regâl ancje a chei che son rivâts a jentrâ te Ostarie propit prime che si sieràs. Vês presint no mo, chei biei locâi dulà che une volte che tu sês jentrât no ti parin mai fûr e ti dan di bevi inmò il tai? Ve li, o sin un di chei puescj li.
Tal regâl o cjatarês no dome la conte scrite di pueste dal Ostîr, ma ancje un articul scrit de Fuguline, la nestre Coghe, sul argoment dal mês. Da rest, e je jê che è à metût a boli la conte e dopo o à proviodût a metile tal plat, stant che l’Ostîr, si sa, al è simpri plen di lavôr e nol bacile masse cul la mis-in-place de pitance.

La conte si clame FUM, e e à dentri il pignarûl, come che podês viodi des fotografiis robadis a une gjate marangule parsore e sot di chestis riis. Il fûc al è chel di San Palai, a Tresesin. E ispirât, l’Ostîr al à ancje dissegnât une biele cuviertine.

L’Ostîr Rafaêl al à pensât di lâ a cjoli i significâts dai fûcs epifanics che a àn a ce fâ cu la lûs e il scûr, cul brusâ ce che al è stât e vierzisi a ce che al podarès vignî, cence lassâ che cualchi brute robe sucedude e ledi a sporcjâ il doman. E il fûc al è bon di jessi maraveôs, ma ancje di sdrumâ, ma i rîts che i son stâts dediâts dai nestris vons plui vielis, come il panevin, a àn pardabon resistût al timp plui a lunc di ogni altri. Inte conte si fevele di un personaç che si cjate propite intune epifanie de sô vite, moment che al coincît ancje cu la epifanie te conte. Il dâsi dongje de int al devente personaç de conte e la tradizion e travane la spiritualitât e religjositât dal event, doprant il fum come maniere par cjalâ e indreçâ lis azions reâls dal protagonist.

Us metìn chi sot, come a lassâ la puarte de osterie vierte in sfese, par cucâ dentri, l’incipit de conte. E us disìn graciis a ducj par la fiducie, par che sês stâts in tancj a iscrivisi e e je une biele sburtade par mandâ indevant la idee de Conte dal mês. A proposit, par chei che a àn voie di tacâ a ricevi i inzornaments, a man drete al è il solit Corinus daûr vie mail. Cumò vonde cjacaris, e ve chi l’inizi di…

FUM

Al à fat il zîr a larc, passant daûr dai orts e inçopedantsi plui e plui voltis, tal scûr, su lis cumieris uçadis di civons e grumbulis di tiere. Di trat in trat si è fermât a cjalâ la lune, tirant flât a grops pe fature, ancje se al à une etât che i plui lu clamaressin ancjemò zovin. No i pâr vere di podê cjalâle cetant a lunc. Basse basse, pene poiade sui cops, e je inmò lontane dal jemplâsi e cussì i pâr cuasi di viodi doi cuars dissegnâts di un canai, che a pochin la gnot cence che lis stelis si scomponin.
I torne iniment la imagjin di un taur di cuant che al jere ancje lui canai.
La mestre i veve picjât il dissen, fat cui penarei, tal tabelon de classe, ma a lui i pareve di vê robât alc, parcè che al veve copiât la bestie di une imagjin cirude di sô mari, su la grande enciclopedie che a vevin cjase. Se al jere robâ chel…
Cuissà dulà che al è, cumò, il dissen. E cuissà se e je ancjemò chê mestre, te scuele dal paîs. Sô mari, magari cussì no, al sa benissim dulà che e je. Al larà a cjatâle tal indoman, si dîs, butant un voli al telefonut che nol pues sunâ. Al cjale dome la ore e al torne a inviâsi, intant che un sgrisul i cor sù pe schene.
Pûr no i pâr propit che al sedi chest grant frêt, ator di lui. Unvier, si capìs, ma al sint ancjemò lis fueis dai bearçs sossolâ, a ogni soflade di tramontan, e tes pocis dulà che al varès di crustulâ il glaç, la suele e sglicie cence remission. Ma no si è pintût…

3 coments On La Conte dal Mês di Zenâr

  • Le sere de Pifanie, “pasche tafanie” , sere magiche che za di fruts a à inclaudât dentri di nô chel misteri di esisti, chel scomençâ e finî, chel jessi e no jessi,chel cirî cun tante voie di cognossi l’ intenzion dai dîs dal doman, Il fuc simbul di vite e di muart,flamis a divorâ l’an stât, il fun a cjareçâ sperancis sul gnûf rivât, e nô dopo di chei za stâts cul pinsîr e cui voi a corezi chel fun e falu lâ de bande juste, simpri cun chês cuatri peraulis in sachete “Sarà ce che Diu orà” par cuant che il fun al à voltât pagjne a lis nestris sperancis. Che Diu nol lassi dispierdi inte dismentîe cheste sacre cerimonie sepûr pagane par dut il rest cal intint tignî in fuarce il globo. Le conte no podeve scomença miôr di cussi, a tocjâ il moment plui significatîf dal an . Lussian

  • Stralunade, si o ai cjatât ancje il rest de conte, cuntune passade superficiâl, e ti disarai che lu ai cjatât un grun interessant, par chest mal riservi di leilu cun calme e atenzion, dentri al è cetant di interessant, scrit cun impegnade divozion e sapience intal ripuarta in taule parmîs di fins particolârs lis costumançis dai nestris puars vons, Lussian

Scrîf un coment

This site uses Akismet to reduce spam. Learn how your comment data is processed.

Site Footer