Sante Lussie

– Mame, doman a è Sante Lussie!
– Prin di dut mostrimi il cuader, e dopo cenât a metin fûr da la puarte mieç seglot di aghe, un miluç e un piç di fen e a picjìn une cjalce sul barcon e dentri la tô letarute. Fasìn sveltuts cussì dopo si lavìn e a nin drets a durmî.
La mame di Matilde e met fûr de puarte ancje doi mandarins… e tal doman e cjatarà un biel regâl…
– jo mame i lassarès ancje un pôc di mignestron … o se no chel toc di formadi chi…
– Al mus no i plâs el formadi, e il mignestron lu mangjarìn doman a cene.
– Mame le âtu mai viodude tu Sante Lussie?
– Mi contave la none Anute che une volte di une gnot di burlaç el barcon da la sô cjamare sbatint cul aiar le a sveade e cjalant di fûr in sfrese le a viodude vignî indevant planc a planc, tignint el mus pe cjavece… mi contave che a veve i çucui fruiâts e ator dal cuel un biel façolet plen di stelutis…
– Cui led?
– No usavin in chê volte.
– E vevie ancje i regâi?
– Doi sacs  plens! Ju puartave el mus e un biel sac lu puartave jê su la schene.
– A ce ore passie mame?
– Tal mieç da la gnot, cuant che i fruts a son a durmî.
– Jo no ai sun mame
– Se je a viôt une lûs piade o se el frut nol duâr no si ferme
– E se un al fas fente di durmî?
– Si acuarç subit.
– A Gloria Sante Lussie l’an passât  i à puartât un “tablet” e a Lorenzo une “console”.
– S’al ves di plovi o neveâ si ruvinin  chei struments li, Sante Lussie a preferìs puartâ el necessari… a ti larès ben un pâr di scarpis di gjinastiche che mi parin malmetudis.
– A ti mame ce ti ae puartât Sante Lussie?
– El plui biel regâl a ere une pipine fate cui scampui, el plui brut regâl un toc di cjarbon par vie che ai rispuindût mâl a mê mari, propite chê sere li. A jere miserie,
– Contimi ancjemò mame,
– Nin chi tal braç alore cussì ti tai lis ongulis… une volte ai ricevût un biel astuç di len, a vevi propit bisugne cussì ai metût dentri i lapis, la gome, i penins, el spicelapis, ducj i mei compagns lu cjalavin cun maravee. Tal doman a scuele a jere une fieste, ognun al contave ce che al veve ricevût. Chel che al veve ricevût el cjarbon si vergognave parcè che al risultave di no sedi compuartât ben in famee.
– Ce ore ise mame?
– A son dîs e tu a chê ore chi tu saressis za tal jet…. mi visi ancje che une volte gno pari tornant cjase tart e a scûr si jere inçopedât tal seglot, ribaltade la aghe si jere glaçade e nô fruts tal doman a sgliciavin sul pedrât.
– Mame, ise vere che el nono al veve un mus cjase sô?
– Lu tignivin par tirâ el cjar e lavorâ in campagne. Si clamave Tilio. Mi plaseve puartâi i civons, cualchi toc di pan dûr o une patate cuete tal bevaron. Lui alore al slungjave el cuel e io mi fermavi par cjalâlu roseâ.
– E dopo mame?
– Sul cjâr gno pari mi tignive tal braç e ogni tant mi dave lis redinis in man e io alore stiçavi Tilio a cori, movint lis redinis a scjas. Par fermâsi bisugnave disi “oop” e tirâ lis redinis, invezit par dâi el via tu vevis di di “Gjee”.
– Poie el cjâf su la mê spale… siere i vogluts ch’a son clops.
– Contimi ancjemò mame.
– Cuant ch’a tornavin dal cjamp gno pari i deve di bevi a Tilio tal seglot e ancje un pataf ta lis orelis cence fai mâl. Lu puartave subit ta la stale, soredut cuant che al sudave.
– E dopo mame?
– Ogni tant i spazolave el cuel e la schene par gjavâ el pêl mat e Tilio al steve fer,  sigûr content, cussì mi pareve.
– Mame… mi pice la schene…. però no parsore i vistîts, mi plâs par sot.
– Tu sês ancje tu un biel mussut cuant ch’a no tu as voie di lâ a scuele o cuant ch’a tu ritardis di fâ i compits
– Ce biel mame la tô man cjalde.

di Gaetan Cogôi

2 coments On Sante Lussie

  • E je stade la setemane dai Sants e noaltris o sielzin, in gracie de conte di Gaetan Cogôi, di sierâle lassâus, propite par dâi il benvignût a Sante Lussie, cheste bielissime conte, semplice e plene di tenerece. Intun lunc dialic tra mari e fie si sint i revocs dal timp lât dentri da lis modernitâts dal dî di vuê, Leieitle e dopo preparait il seglot di aghe par joibe di sere!

  • Ancje a otante agns a si po torna fruts leint le biele conte di Gaetan su cheste magiche gnot, cul doman di matine plui lusorôs che di fruts si podeve vê, ancje se le miserie muardeve, ma cence fa mâl . Compliments a Gaetan su cheste biele conte poiade ju intal timp just. Lussian.

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît