Judizi

Doi che a pratindin di jentrâ. Vuê al è puest dome par un. No jere facile par S.Pieri! Massime che un dai doi al businave che lui al veve dirit, che cussì e che culà, insome vierzimi subit!
– Sta cuiet, spiete un moment, o vin dute la eternitât, ce presse ise?! Chel altri li, al à la precedenze, i tocje a lui prime di te.
– Chel li? E cui isal chel li?
– Chel li? Al è Lissandri Manzoni.
– Cui?
– Lissandri Manzoni. Chel dai Imprometûts.
– Chel di ce?
– Dai Imprometûts, ce furlan sêstu?
– Mah… sêstu furlan ancje tu?
– O soi ancje furlan! Mai sintût a fevelâ dai Imprometûts? i Promessi Sposi!
– Ah! O ai capît. E alore?
– E alore, al jere un catolicon, ogni fieste a messe, si confessave, dut, po! E ancje a gjespui.
– E jo! No aio fat il muini jo?!
– Il muini? Ma ce âstu non?
– Vigji Scuete.
– Vigji cui?
– Vigji Scuete, no sâstu cui che al è Vigji Scuete? Ce furlan sêstu?
– Scuete o scrude, tu scugnis spietâ. Lui li al à la precedenze. Nol à pecjâts, nancje un, no, nissun!
– Ih, ih, ih, ih!
– Ce âstu di ridi?
– Dami chest libri, chescj imprometûts. Ih, ih… velu cjatât.
– Cjatât ce?
– Il pecjât. Il pecjât par mandâlu jù par là.
– Ouh! O soi jo culì che o decidi dulà che e à di lâ la int.
– Il pecjât i vûl punîlu, no mo?
– Sigûr dal fat! Ma Lissandri nol à pecjâts, nissun, nancje piçul!
– Esistino polpetis vegjetarianis?
– Ce robe? Ma ti funzionie il casselot?
– Esistino o no?
– No, veh!
– Nancje intal Siscent, no mo, no esistevin.
– Sigûr di no.
– E no isal pecjât mangjâ cjâr di vinars?
– Sì che al è pecjât, ma ce jentrie cumò?
– Ce zornade jerie il 7 di novembar dal 1628?
– Martars.
– Lis gnocis di Renzo T. e di Luzie M. a jerin proviodudis di miercus. Par vie che don Abbondio al cjate i brâfs di martars.
– E alore?
– Alore, miercus, nuie gnocis. Joibe e je la zornade dal frari Cristoful che al fâs il so tentatîf cun don Rodrigo. Di bant.
– Sì. E cun chest?
– Stant che il tentatîf dal frari al jere lât in strucje, Agnese ur propon ai doi zovins il matrimoni par sorprese.
– E po ben?
– E Renzo al va a cirî i testemonis. Ju cjate. Toni e Gjervâs. Ur paie di bevi e ur dà apontament pal indoman. Par fâ cheste sorprese dal matrimoni. Par vinars, duncje. Intal vinars, prime di lâ li dal predi, ju invide a cene inte locande.
– E duncje?
– E ce ur daie l’ustîr a chei trê par cene?
– Eh… ur dà… a mangjin polpetis.
– Polpetis di cjâr. Di vinars. Pecjât! E il pecjât i vûl punîlu, no?
– Ma chei lì a son creaturis di fantasie.
– Juste in pont! Il pecjât al è pecjât. Al à di scugnî sei punît. Se no tu puedis punî Renso e chei altris, alore bisugne punî l’autor!
– Ma…
– Alore telefonistu tu o mi dâstu il numar?
– Ce numar?
– Chel dal purgatori, no! Lu mandìn là.

di Laurin Zuan Nardin

3 coments On Judizi

  • Il nestri Laurin nus regale, propite cheste setemane che o sin a fâ il spetacul sui Sants a Glemone, une conte une vore savoride che e fevele nuiemancul di San Pieri. Che po, si sa, a cui che al lavore te puarte dal paradîs a i capitin di ogni… magari di cjatâ in code un innomenât Lissandri… Dute di lei, cheste conte fate cuasi dome di dialics, e buini par scomençâ ben il fin setemane! La conte, cun di plui, e je di chês che a à partecipât al concors Nelso Tracanelli di San Michêl!

  • E si che in chei agns Lenart di Vinci al veve za inventât le machigne cul bilietin contepersones, ma il cjamerâr nol voleve saventi di spindi palanchis a fa cressi il debit public, e cussi Pieri Sant al dovè sbratasale bessol cui ” lei non sa chi sono io”. Lussian

  • Cjatât sul fat Manzoni! Une falope fenomenâl!
    Par vie che, pardabon, cuant che Renso al va a cene cun Toni e Gervâs al è un vinars. E, di vinars, intal ‘600, nissun ostîr al si sares mai permetût polpetis intal menù! I predis i varessin fat sierâ il locâl intal doman di matine.

    Un fal di cjaval!
    Al pues sucedi ancje ai grancj.

    LZN

Scrîf un coment

This site uses Akismet to reduce spam. Learn how your comment data is processed.

Site Footer