59, ce diambar puedial contâ un numar?

A son i miei agns, e fevelin a cui che mi cognòs di mê, di cemût che o soi fâte, des mês passions, des mês debilecis, dai miei riduçs, des mês lagrimis, des mês ridadis (mai tignudis dentri, e mai stratignudis, forsit, anzit di sigûr, no di siore plene di finece, ma scletis, e purtrop simpri masse da râr rispiet a dutis lis voltis che mi plasarès podê fâlu). Pal fisic no soi cuissà ce, la mê celulite e lis mês formis tarondis no mi angossin cuissà cetant, parcè che mi regali la scuse de menopause ( a lu disin parfin par television!), ma A MI e DI MÊ mi plâs la biade e legre incussience che o met dentri intes tramis de mês birbantadis che stan come une scarpe e une çucule cul numar dai agns! O ài cirût personis di cuant che o jeri piçule e o levi a scuele insiemi pe strade, in biciclete, ma no podevi jessi amie parcè che mê mari no mi lassave, o ài cirût i miei compagns di classe dal Zanon e cun lôr o ài condividût i ricuarts dal nestri plui fantastic professôr, di lui po dopo o ài cognossût il fi, ch’al è deventât il mê adorabil fradi eletîf. O ài frecuentât ancje un cors par imparâ lis fondis de gramatiche de lenghe furlane e propit alì o ài sintût cun prepotence trop e cetant che mi plâs scrivi, no pal scrivi pûr e sclet , ma plui di dut pe condivision des emozions che e svolin fûr de pagjinis a imbraçâ, cjareçâ, e bussâ cui che mi “laike”… ohh tropis a no ti cumbiniju?
Cualchi zornade indaûr o ài viodût il non di une scritôrie che i ài volût une vore ben e lis riis scritis par jè lis ài spartidis, i alis ài contadis al fi che al à vût peraulis di zentilece e gratitudin propit pal fât di vêlis dividudis cun lui.
O soi daûr a frecuentâ un cors di narative in lenghe furlane e o soi cussì tant fûr di coce da la contentece di jentrâ intun mont di fantasie e creativitât, (che jo o sint di no vê dentri di mê) che o soi li come une frute che a si divertìs, i miei prof, i miei “guru” e fevelin di “incipit”, di digressions, di credibilitât dal lengaç, di ritmi e jo mi bêf li lôr peraulis, in cierts moments o rivi parfin a fevelâmi dentri in tal mê cjâf e a fâmi di bessole i compliments. Braurôse come che o soi, parcè che a mi pâr che cualchi volte a le ài induvinade, cence savê, in plui di une conte che a mi à capitât di scrivi! Us prei però di no contâlu ator, parcè che se no il gno om a mi fâs une biele strapaçade, lis sôs paternis a son piês di un seglot di aghe glaçade! Cun di plui, su sugjeriment di un altri prof o stoi leint tancj libris di scritôrs e scritoriis furlans e o stoi gjoldint une vore, di gjonde di frute, se pûr none, cun dute la amirazion pe lôr bravure in tal savê a pandi lis emozions e LÔR SI’ che a san a fâlu, lu fasin di Diu! Ore di cene e par vuê Barbara e à gjoldût a vonde in tal tornâ a scrivi dopo vê riscjât di pierdi l’ordenadôr cun dute la sô memorie, cuntune part (chê di frute, chê di femine, chê di none) di Barbara… Battel. Une bussade a ducj chei che a mi lein, mandi

di Barbara Battel

1 coments On 59, ce diambar puedial contâ un numar?

  • La sinceritât di Barbara e je come il vueli, simpri clare, gjenuine, parsore di un mâr di aghe cuiete, cul soreli di prime matine che al cjale e al rît a conferme dal sio biel podè. Lussian

Scrîf un coment

This site uses Akismet to reduce spam. Learn how your comment data is processed.

Site Footer

%d bloggers like this: