Passion proibide

Mi jerin rivâts i tiei messaçs su Monaco. Mi jeri dismenteât dal dut di viodi il GP e no sai se lu varessin dât in diferide. Par me Monaco al è impuartant, jessint il prin GP F1 viodût te mê vite. Mi riferìs al duel Stewart-Fittipaldi tal 1973. Di chê volte o ai scomençât a tignî par EL RATO (‘73 e ‘74, dopo o passai a la Ferrari). O ai il ricuart dal GP di Monaco dal 1980. E jere la volte di “Daly Airlines” e dal svol de sô Candy-Tyrrell. Lu varai viodût a la Domenica Sportiva une volte tornât de gjite a Vignesie a cjatâ Silvie M., la mê bielissime ex compagne des superiôrs. O jeri un ocjalon orent e plen di bruscs: e o vevi ancje pôcs denârs in sachete. Cemût varessio fat a competi cul so morôs, tâl Mario? Lu imagjini biel, e magari ancje benestant. Tra biei si compagnisi tant spes. Ma ancjemò no sospetavi de esistence di Mario. Silvie mi veve fat une smafarade presentantsi cun sô cusine. O volevi la gjite romantiche a Vignesie e invezit e jere la vuardiane dongje… O ai cheste imagjin: il cûl di Silvie sul parepet dal Puint di Rialto cu la Regade Storiche. E jere un fregul ingrassade. No jere plui la stupende fantacine secje di doi agns prime, otubar ‘78: golfut viole, cjavei colôr mîl, pivicjis: mi veve sconvolt ma no daurman. Dome cuant che inte aule di sience (chê a scjalins) mi veve domandât une pene in prestit. E veve rot la glace cussì. Diu, e jere biele ancje a Vignesie. No che le ruvinàs un pêl di junonic ma e jere une altre Silvie. Si jere trasferide dal Friûl a Mestre; e jere plui gruessute e e veve la cusine di vuardie. Tornât cjase o jeri suturni. O viodevi un tulipan taiât che si secjave sul mobilut triangolâr e angolâr te mê cjamarute parsore dal “Bar Alla Posta”. Mi visi une dì cuntun cîl zâl che al aumentave la mê malinconie. E dopo, chês lungjis telefonadis cul imprest a gjetons. Lis sôs siet letaris cu lis bustis celestinis che o conservi simpri. Lis sôs trê cartulinis. La splendide serade di stelis, cuant che gno pari al curave il pes in curtîl e jo o jeri euforic parcè che o vevi a pene telefonât a jê. Infin, la telefonade di adiu cu la cuâl i disei che o volevi rompi il rapuart telefonic-epistolâr. Ti ai za fevelât di Silvie M. ma la mê vite e je plene di altris feminis… Jê e jere la numar un. Tu sâs za che i ai dedicât une conte e le ai parfin publicade. E jê no lu savarà mai… Une vere passion proibide…

di Checo Tam

2 coments On Passion proibide

  • Passion proibide chê che o publichin vuê, une conte vanzade ancjemò di chês che o vevin scrit par la briscule des Striis e che a si pierdin tal camarin dal ostîr, tornant fûr di bessolis cuant che mancul se al spiete. E il nestri famei, lu savês, al è simpri maluseriôs cuant che al pense a cualchi fantate de sô zoventût, ma ti regale simpri, a contâle, cualchi moment dulà che tu ti sintis propit li, come se al fos sucedût o a ves podût sucedi ancje a ti compagn. E alore vele chi la conte di vuê, par scuvierzi une passion improibide dal famei!

  • Trop biel il mûd che la ment e ten cont il biel dal timp passât, par dâ a le vite une sburte al presint, tantes voltes al ven di domandasi se il nestri presint al vîf cul îr o cul vuê. Mi plâs le conte dal Checo parce e fâs spieli a un grum di int. Lussian

Scrîf un coment

This site uses Akismet to reduce spam. Learn how your comment data is processed.

Site Footer

%d bloggers like this: