Par une amie, par un amì…
O sarai la vôs che us difindarà cuintri ducj chei che us malignin par daûr…
mi sintarês butâ fûr di bocje peraulatis e ofesis che voaltris, o par educazion o par status, nancje o vês mai cognossudis…
o sarai la man, no di fighete e nancje cuissà cetant curade (nuie smalt e nuie zonte di plastiche di alte mode), ma une man fuarte e un tic ruspiose che e cjareçarà la vuestre intal moment che il fondon us samearà une vore profont…
o vaiarài lis lagrimis che voaltris no rivais a sgorgolâ fûr dai vuestris voi parcè che cualchidun us à dît che “no si pâr bon a fâsi viodi a vaî”
o sarai une bestie salvadie che e difindarà il valôr de amicizie cun dutis lis sôs fuarcis, forsit parcè che no ai podût vêle e gjoldile inte etât dulà che je mi varès insiorade di sintiments e valôrs.
vemi a chi, o sarai simpri dongje di ognidune e di ognidun di voaltris… parcè che de bande vuestre o ‘nd ai cetant ricevût e voaltris o sês il gno tesaur, scrin preziôs de me anime…
di Barbara Battel
#885
2 comments On Par une amie, par un amì…
E torne cussì, a sorprese, e cuntune conte cuasi epistolâr une vore dongje a une poesie, dulà che la storie e sparìs par lassâ puest a une declarazion, un invît. O stin fevelant de nestre Barbara Battal, che cuntune vore di plasê o saludin, stant che e jere un pôc di timp che no passave in ostarie. Une curtissime ermetiche e poetiche conte.
Un craciis grandonon a Barbara par jessi tornade intal nestri biel cjantonut di contecurte, e ancjemò cuntune conte di declarazion di amicizie cussi grande , indula che il so bon cûr e la so sinceritât puartin bandiere. Graciis Barbara al plasè che tu nus dâs di leiti. Lussian