Al è pôc ce ridi

Us plasarès eh, che us contàs di chel Carnevâl dal ’17.
Soi rivât in place San Marc suntun cjar sbregât vie di sîs cjavâi cravuats, bocognons e piturâts di ogni colôr dal arc che al puarte il non de place; e jo parsore, cuntune mascarate di cuars e une criniere di leon, che o ai gjavade par spudâ sul pedrât di chê putane di Vignesie! O ai paiât di bevi in dutis lis ostariis de capitâl doprant i bêçs da lis tassis che no i paiavi. I ai zimiât a ogni femine, e gjoldût cun dutis: lis bielis e ancje lis brutis. O ai ridût e fat ridi ogni dun, a cost di gjavai vie i dincj cuntune bastonade. Ah. Ah. Ah. Ce ridi… E alore rideit! Daimo! Rideit.
No aio forsit ridût ancje jo, cuant che gno barbe i à dit a gno pari che al veve un archibugjo grant come me, che o vevi cuatri agns, e cun chel i à sbarât intune cuesse e copât. Ah. Ah. Ah.
E o ai ridût cuant che vevi voie di spacâi il cjâf ae femine che mi àn imponût, une plaie buine dome di lamentâsi cul predi, che e à pensât ben di sghindâ la legnade e meti denant il cjâf dal frut, che si è sclapât tant che une pignate di cret. Ah. Ah. Ah.
E o ai ridût ogni volte che un contadin si lamentave che i vevi metude plene la femine, fasint compagn cun ogni fie che al veve, cussì fâi un dispiet. Ah. Ah. Ah.
E nol à ridût cussì il Cjapitani, che al crodeve di metimi in rie, cuntun podê che nissun Diu i à dât, parcè che i oms a nassin libars e al è il plui fuart che al à di paronâ il plui debul, e mi ven di ridi a pensâ il contrari. Ah. Ah. Ah.
Come che mi ven di ridi de stupiditât di un che par fâti maridâ sô sûr, e salvâ une dignitât che no à mai vude, al rive a fâsi cunvinci e al va a copâti la femine. Puaret… Ah. Ah. Ah.
Sì ma… al è pôc ce ridi.
La veretât e je che fintremai che pacavi i debui, che robavi ai puars o svilanavi li lôr fantatis, us leve ben cussì.
La veretât e je che lis tassis che ur domandavi jo a chei disgraciâts cence un fruçon in sachete a jerin plui bassis des vuestris.
La veretât e je che i stuarts, i bruts, i triscj, chei che no vevin plui nuie di pierdi, a cjatavin il lôr puest tal gno esercit di carognis.
La veretât e je che us ai cjolt pal cûl fin a la fin, vaint cence pentîmi.
Vevis di torturâmi, e intant che ridevi, mi vis dome taiât il cjâf.

di Rafaêl Serafin

Notis sul protagonist de conte: Lucio Dalla Torre
Al nas tal 1696, a Vilalte di Feagne, e al è un nobil, di une famee che za di trê gjenerazions e cumbine ogni sorte di cjativerie e delit, no par nuie di piçul al viôt il barbe a sbarâ al pari par cuistions di ereditât e dopo a paiâ il miedi che lu lassi murî.
Al è biel, grues, fuart, valent tal doprâ la spade e lis armis, sglonf di tristerie che al sbrochefûr di ogni bande e nol vâl il matrimoni cuntune femine cuiete par cuietâ lu, anzit… no content di pacâle di continuo al cîr di copâle ma al bastone a muart il fi che tigneve in braç. Ma nol è om di pentiment tant che al pâr che al vedi invelenade ancje sô mari. L’esercit di delincuents che al met adun al fâs pôre ae Serenissime e la sfide, fintremai a lâ a gjoldisi il carnevâl di Vignesie ancje se al jere bandît di chê tiere. Nol paiave tassis e nol sopuartave nissune autoritât parsore di lui. Al à dât scandul, ancje se za sposât, scjampant cuntune biele amant e lis feminis, intune maniere o chê altre, lis passave dutis, fin a sburtâ un altri nobil zovenot, par riparâ ae gravidance de sûr, a sassinâ la sô femine. Condanât a muart cul suplizi de ruede, tal 1723, al rive a sghindâlu e fâsi dome taiâ il cjâf.