San Simon 2019

Une serade che no si pues dismenteâ, che e restarà te storie de nestre cjare Ostarie! Jo, la Sartore, o eri nossere a Codroip ae premiazion dal premi leterari San Simon, e mi eri sentade te prime rie di cjadreis par fâ lis fotos, cuant che o viôt rivâ prin la nestre Coghe Serene cul piçul Agnul, subit dopo il nestri amì e contecurtâr Gianluca Franco (che al veve vinçût l’an passât).

E stave cuasi par tacâ la cerimonie cuant che e rivin di gran cariere l’Ostîr, il Famei e la Massarie e si sentin juste daûr di me… ma cemût mai erino ducj lì? Jo fasevi lis fotos e no vevi propit idee di ce che al stave par sucedi…

Dopo i discors des autoritâts al è stât let il verbâl de jurie pe sezion dai curtmetraçs, che dopo di vê viodût lis dôs oparis rivadis, e à decidût di no assegnâ il premi e di segnalâ il curtmetraç Doman di Elia Adami.

Subit dopo al cjape la peraule Walter Tomada, president de jurie pe sezion di narative, par anunziâ il vincidôr de plui biele racuelte di contis, che e je intitulade Bisest.

Lavôr articolât e ben studiât, che cui siei contignûts, tal timp istès atuâi e distopics, al scjasse il letôr. La lenghe e je la plui part colocuiâl, ma mai evasive, e il lessic al è avonde svareât. La competence di grafie e je sigure. Pecjât par cualchi piçul fal, massime morfosintatic, che dutcâs si perdone a colp stant la cure narative di une opare che e pant une vision dramatiche di un mont dominât di une fuarce salvadie. Come che al note ae fin il stès autôr, cheste racuelte di contis e devente ae fin un romanç implacabil su la nestre coletivitât di vuê e di doman. La sielte coragjose di evocâ la derive de societât moderne cuntun furlan vivarôs e potent e cree l’efiet di incrosâ temis fondamentai come identitât locâl e malstâ globâl, fasint viodi che justizie e paritât a son plui siums che obietîfs, e che la comunicazion massmediâl e i “social” a son dispès imprescj che no coventin ae comunicazion ma ae persuasion. E no a fin di ben… Un voli trist e dispietât sul nestri avignì. Un avignì che cui che al lei al sperarà di no viodi sucedi mai.

E jo pensavi “Ma cui puedial vê scrite une opare cussì… mi ven in ment une persone sole: nol sarae par câs chel gjenio di un Ostîr?”

Viertis lis bustis cui titui da lis voris, al risulte che la opare vincidore e je stade scrite di Raffaele Serafini.

Fantastic! Vincidôr pe tierce volte dal San Simon! Brâf Ostîr! E pensait che fin cumò dome altris doi scritôrs e an vinçût tre voltis il premi! Ma lis sorpresis no jerin finidis…

La jurie e riten ancje ae unanimitât di segnalâ la opare Une altre vie di Francesco Tami.

Il Famei de Ostarie! Contecurte chest an e à propit sbancjât il San Simon! Cu l’Ostîr tes fotos no sono bielissims? Ce serade, ce serade! E stant che jo soi propit curiose o speri che fra un brindis e chel altri l’autôr al cjati cualchi minût par contânus alc di plui su la opare vincidore Bisest.

3 comments