Robarie nere

Cui fasevie câs che la fotografie sul necrologji picjât inte bacheche dai muarts, juste in place, no jere plui. I necrologjis par solit a restavin picjâts ancje une setemane ma dal dì dopo dal funerâl la foto e sparive.
Jo mi jeri inacuart di chest e o vevi pensât che forsit al sarà stât cualchi parint a distacâle e a puartâle vie, cussì, par ricuart.
Ven a stâi che une biele dì il parint di un muart, secjât di no viodi plui la fotografie bielzà il dì dopo dal funerâl, al va li di Bepo Cassele a domandâ spiegazions. Bepo i dîs che ancje lui si jere inacuart, lant a distacâ i necrologjis vecjos, che la foto no jere plui, ma no i veve dât impuartance. Dut câs nol saveve ce fâ, nol podeve mico stâ a fâ la vuardie dì e gnot ai necrologjis, e cun chel lu veve paiât.
Po ben, al sucêt che ancje cualchi altri parint dai muarts a pene soterâts al va a protestâ. “Buine int”, i rispuindeve Bepo, “Ce puedio fâ,  jo no pues stâ a tignî a ments i cartei. O visarai i carabinîrs, ma si metaran a ridi!” al dîs Bepo par stropâi la bocje.
La vôs dal misteri si sparnice pal pais e la int e cîr di tignî di voli la bacheche, ma nissun al rive a scuvierzi cui che al è il lari di fotografiis. “Al devi petâle di gnot!” e pense la int e un pôc ae volte si met il cûr in pâs e si rassegne a viodi sparî la foto dal muart il dì dopo dal funerâl.
Ven a stâi che daspò diviers agns, Bepo Cassele al ven visât che al è muart Tin Badascule, chel vecjo vedran che al viveve di bessôl come un remit. Nol voleve nissun par cjase e si lu viodeve pôc pal paîs, juste a fâ un pocje di spese ogni tant.
Al devi jessi muart almancul une setemane prime e i vicins di cjase, che si jerin inacuarts de puce che a sintivin dongje cjase sô, a vevin visât i carabinîrs.
Cuant che Bepo Cassele al jentre in cjase par cjapâ lis misuris dal muart, al reste scaturît; tacadis un pôc dapardut, sui mûrs, su la mobilie, su lis puartis, centenârs di fotografiis. “Ve cui che al è che al robave lis fotos dai muarts” al pense Bepo, “Al jere Tin che al veve cheste manie!”.
La foto di Tin Badascule sul necrologji e à durât une setemane e cumò lis fotos dai muarts no sparissin plui.
Al passe un mês e lis fotografiis dai muarts a tornin a sparî.
Che al centri inmò Tin?

di Pauli Jacuz

4 coments On Robarie nere

  • Si svicine la Vilie de gnot dai Sants e o tachin a spietâ chei dal mont dai plui che a vegnin a fâ un scjampon a saludâ. Magari par puartâ vie alc dal mont di ca. Ma se alc al tache a sparî cence spietâ la gnot de Vilie? Cemût la metino? Nus al cont il nestri Pauli, cuntune gnove conte, fresce e nere, tal so stîl sclet e imediât.

  • Pauli, mi maravei che un furlanologo dal to spessôr nol cognossi chel provierb famôs di tempre nostrane ; ” muart un Pape si fâs un altri “. Almancul tal gno paîs al jere un che cui anuncis funeçs al faseve spagnolets cence meti il tabac, e par fuma lesêr al doprave chei das feminis, disè lui che slungjavin le vite. Un grum bielis lis contis di Pauli , metudis adun seont il timp corint , lis stagjons, lis costumancis di îr e di vuê, tant leadis a le nestre amade tiere. Simpri plasê di leiti .Lussian

  • Grassie Luciano, masse bon.
    Jo o scrîf ce che al mi ven su intal cjâf. Cualchi volte mi baste un non, une peraule sintude par câs, un alc che o viôt atôr e mi ven su di meti adun une conte. Jo no ai fat lis scuelis altis e tu viodis di bessôl che lis mês contis a son sempliçutis e pôc intorteadis, ma a mi plasin di istès cussì.
    O ai gust che a plasin ancje a cualchidun altri.
    Mandi e ten pronte la moche.

  • Pauli.
    Saraial Tin Badascule o ben pûr un altri? Cussì la intrighe dal misteri e torne a sparniçâsi pal paîs.
    Biele conte che cul so finâl viert, al permet ai letôrs di fantasiâ sul sucedût.

Leave a Reply to Pauli Jacuz Cancel reply

This site uses Akismet to reduce spam. Learn how your comment data is processed.

Site Footer

%d bloggers like this: