La disfide

La Giulia verde 1300 e mangje i chilometris di autostrade par rivâ a Vicence…
In cinc in machine: trê zovins e doi grancj. Mio pari e mio barbe che a fumin par dut il viaç. Bert che al coree. Nicola che al rît.
Ma ce lino a fâ a Vicence? A viodi la mitiche disfide tra Udin e Parme par lâ sù in B! Lis dôs  scuadris a son rivadis primis a pâr tal ziron de Alte Italie.
Jo o ai dîs agns e o soi bielzà un piçul apassionât des partidis al mitic Moretti. L’Udin al à i stes colôrs dal Parme e al piert la sortade des mais. Al scugne zuiâ in vert e al samee l’Avellino. Il Parme al à une bielissime maie cu la crôs nere in cjamp blanc e tal stadi a son tantis bandieris cul stes motîf tant che al samee di jessi sul set dal film Aleksandr Nevskij di Eisenstein e chei dal Parme a son i Cavalîrs Teutonics (o ai bielzà viodût part dal film in TV). E mancje dome la glace. L’Udin al zuie cun ZANIER; ZANIN, BONORA, POLITTI, PIGHIN, ZAMPA; PELLIZZARI, GIACOMINI, BLASIGH, GALEONE, PAVONI.
A mancjin Girelli e Dedè, i  nestris doi fuarts atacants.
E purtrop lis robis a van mâl. A la fin i “Teutonics” si imponin par doi a zero e jo no rivi nancje a gjoldimi l’ultin cuart di ore parcè che o ai scugnût lâ tal cabôt e dopo o ai cjatât un sdrume di int che mi impedìs di tornâ in tribune.
Bon. Si torne a cjase scuintiâts e si varà di spietâ ancjemò cinc agns par viodi finalmentri la B.

Mio pari e mio barbe a son muarts di agns. La Giulia 1300 e je finide intor di un platin propit tal an de promozion in B.
Il Moretti nol esist plui. L’Udin al è in serie A e plen di campions di ogni bande dal mont ma distès no si rive a meti adun une scuadre dignitose. Si combatarà par no lâ in B. Lis mais a cambin ogni an, soredut par vendilis di plui ai fans. I zuiadôrs si son trasformâts in oms-sandwich. A cjapin beçons.
Spes si metin insiemi a lis “velinis”.
Il stadi lu àn trasformât intune bomboniere o intune astronâf aliene. E jo o varès di lâ a viodi cualchi partide?
O ai miôr cjatâmi cun cualchi amì e fâ cualchi torneu di Subbuteo. O ai pene comprât lis scuadris dal Botafogo di Rio (al à ancje chel la maie blancje e nere a riis, come l’Udin) e dal Parme. I pipinuts a son ben piturâts. O vin il pano vert, lis puartis, la bale, lis biris… no nus mancje nie. La disfide e pues scomençâ. E cheste volte magari il risultât finâl al sarà diferent…

di Checo Tam

3 coments On La disfide

  • Al è lunis, e cuasi a sconfessâ lis peraulis de conte dal nestri famei, l’Udin îr al à vinçût e al à i stes ponts di dôs scuadris di blason tant che Milan e Torin. Ma lis robis no levin simpri cussì, lis robis a jerin une vore diferentis cuant che si zuiave al Moretti e si veve di barufâ par meti pît in serie B…

  • E culì il Checo al vîf che maluserie ( e nò dome lui) intal viodi che scuadre che a fin campionât ti fâs vivi chel eterni ritornel ” si salvie o no si salvie” jessi o no jessi disè chel om cu le crepe in man. Lussian

  • La foto e rapresente l’UDINESE 1972-73. Campionât di serie C – Alte Italie, propit chê rivade prime ex Æquo cul Parme.
    Di çampe a diestre in pîts: Zampa Girelli Giacomini Pavoni Pighin Zanier
    Di çampe a diestre scrufuiâts: Pellizzari Zanin Politti Dedè Bonora
    Cheste e je la “formazion tipo” ma in scuadre a jerin ancje Galeone, Blasig, il secont portîr Da Pieve, il zovin Mendoza, nassût in Venezuela, Jesse, Comisso I e II, e altris che no mi visi.
    Ce voladone! A dôs partidis de fin a jerin ben cuatri lis scuadris in lize par un puest di B: Udinese, Parme, Alessandrie e Vignesie. A la ultime partide si cjatarin dome Udinese e Parme a pari ponts. Di li la disfide…
    Bisugnarà spietâ ancjemò cinc agns par lâ sù, alenâts di Giacomini, propit lui, chel che si viôt in foto. Si notin ancje i cerclis des tacis di vin (in alt a diestre) parcè che la foto e jere stade suntun taulin di bar sede dal “Udinese Club” dal gno paîs.
    E jere une altre epoche. Numars dal 1 al 11, nissun sponsor su la maie di coton, nissun control par jentrâ, nissune percuisizion, nissun “tornel”… e nissune violence… almancul che mi ricuardi jo…
    Une atmosfere di fieste cuant che si zuiave al mitic Moretti…
    Il 1973 al jere l’an da la “austerity” e des targhis alternadis e dai siôrs di Lauçà a vevin creât une machine a pedâi cu la caroçarie de FIAT “Giuseppina” dai agns ’20. Cussì a podevin lâ ator dutis lis domeniis. Al dì di vuê a varessin vût la benedizion di Sante Grete Thumberg!
    Une domenie la “Giuseppina” e rivà al Moretti cuntune cjarie di damigjanis di bon vin di ufrî ai tifôs.
    Cemût si fasial a dismenteâ chei moments?

    FIRMÂT: IL VUESTRI FAMEI

Leave a Reply to Anonim Cancel reply

This site uses Akismet to reduce spam. Learn how your comment data is processed.

Site Footer

%d bloggers like this: