Il riflès

Vele la strie!
Cjapait la strie!
E lui e so cusin a corevin daûr a chel riflès cence rivâ mai a cjapâlu. Barbe Remo al veve un spielut e ju cjapave in zîr cussì, tant che i grancj a vendemavin. Tunin e Zorç non rivavin a capî cemût mai che la strie e fos cussì svelte a scjampâ vie… a saltâ tra lis casselis plenis di raps di ûe, a polsâ dome par un istant su di un palet di ciment o pûr a sfantâsi par dopo tornâ a comparî.
Tunin al amave la vendeme e i plaseve un grum zuiâ cun so cusin dongje di un grant caratel plen di aghe. Si divertivin a fâ nadâ dai piçui pipinuts di plastiche, a inneâju ma chei no lavin mai jù e a tornavin simpri parsore.
Intant par aiar al passave un avion e al butave jù dai manifestins. Lui e so cusin a levin a cjapâju sù tal mieç des blavis. A jerin di varis colôrs… zâi, verts, ros… ma ducj cu la stesse scrite parsore: PIOGGIA GRANDINE E TEMPESTA MA L’ALITALIA NON S’ARRESTA.
Di gnot, cuant che si leve a durmî sui materàs di scus tes cjamaris de cjase coloniche la strie e tornave a la cariche ma cheste volte cui rumôrs. Si sintive alc che al cricave sul cjast e dal di fûr ogni tant al rivave un vuicâ che al faseve vignî i sgrisui.
E la none e contave spes la storie di cuant che, di frute, tornant de funzion de Vilie dai Sants dal paîs fin al cjasâl e viodeve une lûs che i cjaminave a flanc a cualchi desene di metris di distance o almancul cussì i pareve… ce jerie? Une strie? Une anime di muart? Un riflès? O un UFO?

Cumò Tunin al è grant e nol crôt plui a lis striis. Ma al pense che a sedin tornadis in altris manieris.
La marine dai Stâts Unîts e à rindût public il fat di avistament di UFO de bande dai avions di vuere F-18, dome che no ju clame plui cussì par evità il ridicul. Ju clame “Fenomens volants che no si rivin a spiegâ”.
Vele, la strie! Velu il spieli di puar barbe Remo che al torne, al à pensât Tunin, o miôr Toni.
Dome plui atuâl… ogjets volants che a corin a alte velocitât e dopo a sparissin. Masse comut. Li al à di jessi un difiet te strumentazion eletroniche, un “riflès”… il moderni “spieli de strie”…

di Checo Tam

2 coments On Il riflès

  • Il riflès… sì, ma il riflès di ce robe? Di une strie? Dai timps? Di un spieli? O di dut chest metût insieme? No si sa! E covente une conte dal Checo, di chês che i vegnin miôr e che a messedin realtât e fantasie, timps e misteris. E il dut, come simpri, in pocjis (st)riis, Dute par voaltris, cheste conte dal vinars dal nestri famei, in plene forme!

  • Biele le conte dal Checo a presenta le nocense dai fruts di une volte, in zucs di fantasie e pocje spese, a diferençe di chei di vuê indulà che le eletroniche e mangje le fantasie e le manualitât di iniziative personâl inte lôr creazion e gjestion. Lussian

Leave a Reply to Anonim Cancel reply

This site uses Akismet to reduce spam. Learn how your comment data is processed.

Site Footer

%d bloggers like this: