Il complean

Doman al è il complean di gno fi. Il so prin complean. Un an. Dodis mês di ridadis e di vaiudis e di voi che mi cjalin cu la espression plui pure che o vedi mai cognossût. Dodis mês di gnotoladis in blanc, di tetis sglonfis, di cjavei che a colin ta ducj i cjantons de cjase.

Mi plasarès dî che a sedin stâts ancje i mês des spassizadis cul birocin, des compris matis in vistiduts, des cjançonutis in spiete de sô prime peraule, de prime volte in pîts, de prime cjaminadute.Tropis primis voltis puedino jessi par un frutin cussì piçul? A somein infinidis. E jo, a tropis primis voltis jerio? Dôs, une? Cuasi nissune.
A trê mês dal part o soi tornade a vore. E je finide la bubane, mi à dit il gno coleghe a pene rivade. Dal rest, cuntun om in casse integrazion, ce podevio fâ? E po, o savevi benissim che il gno puest si jere za sfredât masse, e che o varès scugnût fâ i salts mortâi par tornâ a scjaldâlu. Come che no ves mai fat un colp di nuie, prime.
La uniche comerciâl femine pal orest di dute la aziende, une des pocjis multinazionâls sul teritori furlan. Un colp di cûl, a vevin dit ducj tal imprin. Une matuçade dal paron, al veve ghignât cualchidun, biel che al cimiave in maniere triste in direzion dal gno decoltè. Coions, o vevi pensât dentri di me, e in tal zîr di pôcs mês ur vevi dimostrât a ducj chei bubez che ancje une femine e podeve fâ il lavôr di un om, massime se cun dôs laureis in sachete, trê lenghis forestis feveladis come une marilenghe e un pôc di snait di chel che si dîs. No jeri plui la cheerleader che e fâs la mone tal interval. O jeri un zuiadôr ancje jo, e un di chei che a fasin la diference te partide. Fin cuant che o soi restade incinte. Li si è sfantade dute la complicitât. O crodevi che daspò dal part lis robis a saressin ladis miôr, che e fos dome une fase di transizion. Ma a pene che o soi tornade, dute la carognetât di cheste societât mi è colade intor. I coleghis mi cjalavin tra il dûl e il sarcasmi. Altri che felicitazions pe vignude dal frut, al someave che o ves vût un tumôr! Une che si lasse meti plene no je degne di restâ tal grup, tal câs e pues juste stropâ cualchi buse.
O la cariere, o la famee, ninine, mi à dite il paron, cuant che o soi lade par domandâ parcè che mi veve lassadis dome lis ratatuiis. Ancje chê volte, o ai parât jù i grops e mi soi metude sot par dimostrâ a ducj chei afariscj di mierde che si sbaliavin. E vuê a varan la conferme di trop che o vâl, dopo dal incuintri cul client todesc che ur ai tirât dongje e che al podarès comprâ une buine slepe dal magazen. Simpri se o rivi a convincilu.
Mi soi preparade par setemanis. Ancje vuê di buinore, biel che o menavi il piçul al nît e lui al rideve a sintî chei strambolots par cruc. Puar nini, ce pazience che al à di vê cun sô mari. Ma doman si fâs fieste. Fancûl ancje il lavôr. O ai di lâ a ritirâ la torte dopo. E lis cjandelutis, e i balonuts e la robe di picjâ… di bon che al va so pari a cjolilu, cussì o ai timp di fâ la spese e preparâ dut. Ma cumò pensìn al incuintri. Veju li, chei deficients dai miei coleghis, che mi vierzin la strade come se o fos la Madone santissime. Stronzos. Vuê no vês batudutis sui miei chilos in plui, vere? E velu, il client. Va la, fantate, come che tu sâs tu. Incjadenât. Tu sês gno. E je fate. Une strente di man e palanchis che a rivin ae aziende. La muse entusiaste dal paron che mi cjale come se o fos une fie. Macaco, come se no tu lu vessis savût.
E cumò lassaitmi tornâ a cjase. Il telefonut che al vibre. Emanuele che mi cîr. Ce dal diu isal sucedût cumò? No sta a dîmi che no tu rivis a lâ a cjoli il frut. Il frut? Tal nît, come ogni dì. Tal nît, lu ai menât jo a buinore. Tal nît… ma tal nît il frutin nol è mai rivât.  E la zigade disperade cui coleghis che mi cjalin come une indemoniade, la corse cul cûr che al sclope fin ae machine sot dal soreli, la sente che e varès di jessi vueide e invezite à alc parsore, fâs che al sedi dome un pipinot…

Nol è stât nissun prin complean di gno fi. Lu àn soterât îr a buinore. E jo no soi stade presinte nancje ae sô ultime cerimonie.

di Fuguline

2 coments On Il complean

  • Ve chi… cualchi volte ancje chei de ostarie a cjapin gust a poiâ une conte. E cuant che lu fâs la nestre Coghe, podês stâ sigûr che no us lassê indiferent, soredut pe siele dai ponts di viste tal contâ che e fâs. Un teme une vore in discussion, in chescj dîs, e come che spes al capite, ae fin di une buine storie, a restin domandis, che no àn mai une sole rispueste.

  • Si lei di spes disgracis di chest gjenar, e dut par che maledete premure pal lavôr, pûr di rivâ indula che mai si rivarà, e chest dut a scapit de vite nestre intal viodi a pierdisi che apene rivade, e a scunî le nestre. Disaress che le nestre coghe nus à servîts di une pitance che pûr lassant tant marum in bocje, nus impegne il cerviel a pensâ un grum parsore. Lussian.

Leave a Reply to Gelo Stellato Cancel reply

This site uses Akismet to reduce spam. Learn how your comment data is processed.

Site Footer

%d bloggers like this: