La storie di Semre

Mascjo o femine?
Al è un biel probleme, se tu âs di sielzi tu ce che tu preferissis jessi, come tal me câs. Jo no esist pardabon, e prime esistevi ancjemò mancul. Ma a un ciert pont, intant che o jeri a balinâ tal Nuie Cosmic, o ai sintût une vôs:
“Semre, e je la Vôs che ti tabaie! Mi covente cualchidun par ocupâ un puest impuartant inte societât dai umans. O ai un lavôr par te, ma tu varâs di jessi crot.”
Prime di dut mi soi domandât se la Vôs e intendeve “crot” tal sens di cence vistits o “crot” tal sens di bestie. Savêso, nol è facil capî dal contest cuant che no si esist. E jo no esistevi propite, cemut che us ai dite mi soi metût intun cuarp dome parcè che al jere bisugne di cualchidun par chest lavôr. E alore mi soi cirût un stîl e un motif. E o ai decidût di jessi om e ancje femine.
Se mi cjalais de vite in sù, o soi femine. Crote. Forsit une pôc di bon, ma buine di fâi tremâ lis gjambis ai oms. Une strie, magari, cu la pericolose fuarce che al à simpri vût un cuarp di femine. Se mi cjalais de vite in jù, o soi om. Dal sigur ninin, cence difesis e cuntune grande sensibilitât, un om frut che si è disvistût dal podê virîl. Opûr un di chei oms crots di une volte, chei atletis ducj invueleâts che no vevin vergogne ma dome bielecis di mostrâ. Mi soi costruît cussì: e sarês d’acuardi che passâ dal Nuie Cosmic a jessi une creature sedi om che femine al è un pas indevant nuie mâl!
E mi domandi: voaltris, se podessis sielzi, ce saressiso? Compagns di cumò? Mascjos fuarts e incuadrats intal vuestri rûl? Feminis lizeris e balarinis? O saressiso un pôc cussì e un pôc culà? E il vuestri cuarp trop isal impuartant pe vuestre identitât? Isal un pês o un amì?

P.S. Ae fin, il lavôr che mi à proponût la Vôs e jere une freadure. Cun di fat…vêmi cà a tabaiâus distirât suntune cjarte di briscule, cence nancje la tierce dimension. No dome: mi àn travistût di Ermes, diu dai Grecs che, us disarai, no mi plâs nancje tant. Ma ce volêso, ognidun al à il so destin.

di Margarite Cogôi

5 comments