fbpx

La firme

Lino Zorat i voleve ben a la sô mame. Un ben di vite. Ma inte vite, cuant che lis robis a van mal, i vûl… i vûl judâlis a lâ ben.
Sodisfat de sô vore, Lino al siere il libret, lu met ben in ordin dentri intal satûl e po dut intal borson di scuele. Ancje chê e je lade: la firme de mame (che lui i vûl tant ben) e à passât ancje l’esam dal professôr plui sevêr e plui pignûl. Se nancje lui nol si à nacuart di nuie al vûl dî che la firme e jere propi ben fate. Oh là! Parcè dâi un displasê a la mame che lui i vûl tant ben?!
– Zorat, portami il libretto.
– Eh? Ma… ma lo ha già visto!
Nuie di fâ. Il prof al à slungiât un braç par fûr de catidre e al spiete.
– Ma…
Al bat un colp cu chê altre man vierte: segn che nol à chê di spietâ di lunc. Nol è ancjemò rabiât, ma insome…
Al zire lis pagjinis dal libret une par une, ce cirial chel ostregon di un professôr, aial un suspiet, che nol vedi di vê vût un suspiet?
No. I torne il libret cence dî nuie. E Lino solevât, al torne tal so puest e al cîr parfin di stâi daûr a la ecuazion che e je daûr a rimpinâsi su la lavagne. Cussì magari intal prossim compit in classe o cjapi un sîs e mieç, magari un siet e alore ce sodisfazion pe mame!
– Zorat, fammi, fammi vedere il libretto.
– Ma… già due volte…
Cumò la man fûr de catidre si le viot che e menace di sierâsi in pugn. E Lino al scomence a sudâ. Un tichinin, no tant.
– Chi ha firmato qui?
Lino le à pronte la rispueste, nocate lis gotis di sudôr che a tachin a sflurîi sul zarneli.
– Mia madre.
– Sicuro?
– Sì.
– Bene.
I aie tremade la vôs cuant che al à dit ‘mia madre’? No, al crôt di no, però ce sbigule! La ecuazion a la lavagne e je simpri lì, imberdeade intôr di un zes che Vanessa e je daûr a smalfiâ.
Chel li, chel diaul di un prof al scrupule alc, che diu nol vueli! Parcè dâi un displasê a la mame che lui i vûl tant ben? Il prossim compit Lino al è sigûr di cjapâ almancul un siet, magari un siet e mieç e alore…
– Zorat, fammi dare un’occhiata al libretto.
Ahi. Ahi. E ancjemò ahi! Cumò la robe e je serie. Cumò e tache a dulî. Ce aial di fâ cumò un puar arlêf par no dâi un displasê a la mame che lui i vûl tant ben?
– Cui aial firmât culì?
Al è passât a fevelâ furlan. Uhm! Dificil che al sei un bon segn!
– Mê mari.
– Sigûr?
– Sì
– Sigûr, sigûr, sigûr, sigûr, sigûr, sigûr?
– Sì.
Scuasi vaìnt.
E cheste volte il pugn dal prof al è penç e al svole jù su la catidre tant che un ton dal mês di Avost. E dute la classe e pete un salt.
-E invezite no!
Al si jeve su di brut, il prof. La sô cjadree e va a sbati cuintri il mûr, va e no va che si rabalti. A Lino lis gjambis i fasin jacum jacum, il prof al è za su la puarte, la vierç.
Lino i vûl tant ben a la sô mame. Ma…
– Siore che e vegni, che e vegni dentri. A viodi ce tant biele firme che e à fat jê, cence savê!
No che Lino i vueli mancul ben a la sô mame. Ma…

di Laurin Zuan Zardin

2 coments On La firme

  • E us regalins une conte in teme, vuê, E il teme, induvinait, cui miôr dal nestri Laurin nol podeve cognossilu, ven a stâi la scuele! Scuele che e scomence doman, e cun dut che cumò si doprin i imprescj digjitâi, o scometin che cualchi falsari al reste simpri… 🙂 Dute di lei, cheste contute lizere, che prin di une ridade, nus conte ancje di une scuele che no je plui e nus fâs cuasi sintî dentri di un film in blanc e neri.

  • Il gno periodi di scuele al jere miôr di chel di Zoratt; svangja l’ ort de siore mestre in primevere, bon ajar difûr de aule, cjantavin ucei a perecja il nît, E intal cîl tanci avions e passavin fasint mîl gjerumetis contents di vê finide le vore in vuere, e cjalâ ogni tant pal balcon dentri le scuele a viodi i miei compagns sfortunats a fa astes te lavagne cul ges, e dopra il balotolîr par sgarzasi a impara a fâ di conts cence doprâ i dets, e cumò mîl lujanîs a rompi i tabars a di chei puars fruts. Lussian

Scrîf un coment

This site uses Akismet to reduce spam. Learn how your comment data is processed.

Site Footer