fbpx

Cortesiis par Contecurtârs

E al propite cussì, o stin progjetant, achì su Contecurte, une sorte di “Cortesie per gli ospiti”, che po, i nestris prins ospits, a son propite i contecurtârs. E ce cortesiis? si domandarês… Ve chi, che us al disvelin.

Te seradi di Flambri o varês viodût che lis nestri cuatri striis a jerin ben cjapadis a zuiâ di cjartis… e lis cjartis, lu savês, a jerin cjartis particolârs, che ogni volte che si zuie une e nas une conte curte. Si che duncje, a cualchidun i sarà vignude la curiositât di savê se lis cjarticurtis a esistin pardabon o se a jerin dome une invenzion de serade. Secont voaltris? L’ostîr nol si sarà mica metût a dissegnâ lis cjartis une par une, par proviodi lis sôs striatis di un mac di 40 cjarticontis?

E invezit sì! La int, al è clâr, no podeve viodilis (lis striis, si sa, a son une vore gjelosis dai lôr segrets) ma l’ostîr al è rivât a convincilis e a lassâ che lis cjarticontis a deventin, apont, une cortesie par i contecurtârs. Soredut par chei che magari a àn voie di lassâsi ispirâ a scrivi une storie e a cirin cualchi idee.

Us metin chis sot dutis lis cjarticontis par podê sielzi un Lûc, o des Creaturis, o des Robis o des Peraulis e stiçâ la vuestre fantasie par scrivi une conte.

Creaturis: budiese, purcit, gjaline, cheche, vacje, orcul, gjatut, vipare, surie, strie.
Robis: modon, musine, cogume, britule, fisarmoniche, cjapiel, radio, cjalderie, cjartis di briscule, vignarûl.
Lûcs: cjamp di blave, flum, glesie, puint, cimitieri, morârs, cjampanili, montagnis, cjistiel, mâr.
Peraulis: inniò – scalembri – figotâ, scjapinele – grubian – sbeleâ, fregul – salacôr – cuinçâ, sbisiâ – babio – salustri, snait – çondar – marcolâsi, tananai – morestâ – sclagn, imbast – mastiefumate – dandanâsi, licôf – clip – patafâ, scarsanali – ofegât – calumâ, patoc – barlumâ – grim.

Cun di plui, stant che nus plâs che la nestre Osterie e vedi cualchi conte a teme cul periodi, e che nus plâs, ancje, tal câs di seradis di leturis di contis, vê contis a teme di bande dai contecurtârs, o fasin ancje un altri invît ai nestris “ospits”. A sono dôs ricorincis, che si svicinin, dulà che ‘nd è une vore di tradizions e usancis che si puedin lâ a cirî. O ancje cence lâ a sgrafâ tai cantins des tradizions, li ricorincis si prestin une vore a jessi dopradis come sburt par impiâ une idee. Une e je la gnot de Vilie dai Sants, cun dutis lis storiis di pôre che si puarte daûr. Pôre dai muarts, dal scûr, di creaturis misteriosis… insome, par il 31 di Otubar sarès biel vê cualchi “conte di pôre” su la osterie. Che altre ocasione e je il periodi di Nadâl, che a partî di San Nicolau e Sante Lussie al rive fintremai a lis cetantis manifestazions de Epifanie. Nadâl al un biel stiçadôr di contis, seont noaltris, e ancje in chel periodi, come che o vin za fat i agns passâts, al sarès biel vê cualchi biele conte a teme. Cussì o tirin chest clap ai contecurtârs: cjarticontis + contis a teme (Vilie dai Sants e Nadâl). Cuissà ce che al saltarà fûr…

A voaltris contecurtârs la peraule. O spietìn lis vuestris contis!

Note ben: cuant che o vês scrite la conte al baste mandâle, zontade intun document di test, ae nestre direzion di pueste: contecurte@gmail.com. Cualchi consei in plui lu cjatais te pagjine de Ostarie te sezion “Par mandâ une conte”.

 

5 coments On Cortesiis par Contecurtârs

Scrîf un coment

This site uses Akismet to reduce spam. Learn how your comment data is processed.

Site Footer

%d bloggers like this: