fbpx

Salustris di tramontan

La tramontane, al so pas, no dome e siere puartis e e vierç barcons, ma ancje e provoche il lâ e tornâ di vecjos ricuarts come lamps dal passât…

…ti viodevi pitinin, cuant che i tiei voi a slusivin di gjonde e nol coventave domandâti nuie, cuant che la tô façade si imbrunive e e jere par dai moments ledrôs, il marum nol rivave a scuindisi, la tô avilizion e jere di no podê o no  volê metilu in peraulis.

… ti viodevi tes buinoris cuant che Sante Luzie ti puartave dai dons, al pareve che la tô sorprese e tocjàs lis stelis. Saltant dôs rampis di scjalis tu tu jessevis in strade par confrontâti cun chei altris fruts, la tô muse e mudave man man che lis diferencis si fasevin palesis, al finâl, tu tu ti fermavis a fâ clape cun chei che a zimulavin di plui cui tiei regâi.

… ti viodevi tai dîs di sagre, devant dai barachins abraçant bramôs ducj chei goloseçs: – Trop costial chest, trop costial chel? – intant che tu tu separavis lis palanchis par fâ un zîr di gjostre. Finalmentri e al sun di legris notis tu tu svolavis in grope a un pûr sanc dorât cun bluatis crinieris, tu tu someavis un puieri cul cjâf dreçât a la pâr dal to leâl compagn di tantis epichis aventuris.

… ti viodevi a dotrine, te sielte dai fruts che, vistûts come donzei medievâi a varessin compagnât il Santissim te procession, tu tu ansiavis partecipâ, imagjinant di paronâ come cjastelîr sore bens e personis, riparant rusinidis beghis di famee, urdint aleancis, rinfuarçant il to status, lafè si… ma la patafebancs di turni simpri ti rompeve chel insium, il to non mai al comparive te liste dai elets. Indalore la tô muse si faseve blancje, ruane, la tô cjalade si fermave. A jerin come pachis che ti duravin fintant che la magle dal ematome e sparive.

… ti viodevi, ancje privilegjât, za che la vite ti donave moments di ogni fate. Ma cul cressi, chel stât di inocence al le disfantsi come la nêf tal soreli, lassantti une mare ilusion di un mont fat di cjarte peste piturade. Ancje se tu ti mascaravis, lu stes si viodevin i cambis di umôr che a levin de sperance al disingjan e de ligrie ae avilizion.

Cussì la tramontane, al so pas, no dome e siere puartis e e vierç barcons, ma ancje e provoche il lâ e tornâ di vecjos ricuarts come lamps dal passât.

di Galliano di Buenos Aires

2 coments On Salustris di tramontan

  • Galliano mi dîs che chi di nô e va finint la Istât, là di lôr, in Argjentine, al capite compagn cul Unvier. E je ore di tornâ a movisi, mi dîs, e al à reson. Cussì ve chi che vuê nus regale, come che al fâs simpri, puntualissim, une conte. Une conte che e cjale indaûr, movint i ricuarts cul vint de memorie. No si pues scjampâ de maluserie… ma si pues jessi in pâs cul vuê, come che il sens de conte nus lasse. Grassie Galliano, come simpri un grant regâl pe nestre ostarie, lis sôs contis.

  • Disfidi ducj, se un ,un sôl, no si cjate dentri cheste biele conte di Galiano, indula che l’aiarin de primevere, purtrop, si dislîd cui agns lassant puarte vierte al tramontan, e nô vivi al rispîr di chel cjâr aiar pasât. O ai grande amirazion su Galiano par il leam mantignût a la so, e nestre piçule patrie . Compliments Galliano

Scrîf un coment

This site uses Akismet to reduce spam. Learn how your comment data is processed.

Site Footer