La cene

A smiling vintage man in a Priest’s uniform.

Il dotôr nol veve dadis sperancis. Lui nol podeve plui fâ nuie. I ai dât un calmant, juste cussì, par compagnâle… aromai… dome spietâ.
Clamait il predi, al veve dit. E rassegnaitsi. Ce voleso? I agns, la etât…
Pino lu veve compagnât su la puarte, po al jere tornât inte cjamare de viele.
– Alore … jo o voi a…clamâlu…
E al cjalave bande Ines.
Ines no voleve jevâ sù il cjâf, no voleve che a viodessin lis lagrimis che i jemplavin i voi.
Pino: – Aio di clamâlu, lu clamio?
La domande e svoletave inte cjamare, e podeve sei par ducj, fîs, nevôts, ducj. Ma e jere par Ines, dome jê e podeve sei contrarie. Veramentri nancje la none murinte, no veve mai vude chê grande passion pe glesie, e lave dome chês cuatri cinc voltis par an. Ma Ines e jere piês, Jê e lave dome ai funerâi…
Pino cumò al cjalà fis sô sûr: -Voio?
E Ines e murmuie alc, cence jevâ sù il cerneli: – Baste che nol vegni fûr cun chê sô solite storie de cene cul Signôr!
E il predi al rive sot gnot, ise in sé? Puedio confessâle? Fevelie? Se i feveli, mi rispuindie? O come il vueli sant, alore?
Biel che il predi al è che al siere la cerimonie, cun cualchi Avemarie (cualchidun i va ancje daûr  preant), Ines e scuen cirîsi un fazolet, inte sachete. E il voli i cole sui voi de viele.
A son vierts. Vierts e vîfs. A cjalin fis. A cjalin fis il predi.
– Mame. Mame, mi sintistu?
Ma la viele no rispuint, dome e cjale fis il predi.
Alore il predi si fâs dongje: – Coragjo, agne Mabile. Coragjo che usgnot o sês a cene cul Signôr!
A son trê, cuatri dîs che no à dit une peraule, la agne Mabile che i mancjin un pâr di setemanis par fâ 89 agns. No fevele plui!
Ma cumò lis sôs peraulis i vegnin fûr claris che ducj lis sintin, bielis netis: – Vegnial ancje lui, siôr Plevan?
– O ai za cenât jo!

di Laurin Zuan Nardin

4 coments On La cene

  • E par finî la setemane in bielece, nuie di miôr di une conte! Magari forsit une contute no tant legre, si, cuissà… i predis in cierts moments nol è biel viodiju. Ma leieit voaltris, fin insom che come simpri il nestri Laurin nus al à conte curte e sclete, e chest colp al dopre il 99% de conte par descrivi la situazione e une grampade di peraulis… par rabaltâle!
    A voaltris!

  • Le potensie des contis di Laurin e son deflagrantis, come ches minis cussi ben ordenadis a butâ ju un palaç su se stes cence che un modon coli fûr lûc; cun chês cuatri peraulis -vegnial ancje lui, siôr plevan- O ai za cenât jo. Simpri grant il plasê di leiti Laurin. Lussian

  • GRAZIS.
    lzn

  • Biele e gustose Laurin e o scomet che Mabile e à campât ancjemò, juste par dâle sul nâs al predi.
    Mandi

Scrîf un coment

This site uses Akismet to reduce spam. Learn how your comment data is processed.

Pît di Pagjine dal sît