Dome un pirul di pêl

No à resistût. Come che ju à viodûts, un parsore di chel altri, intant ch’a cirin di tetâ de mari stravacade te cosse, e à pensât subit ch’e varès dât seont a l’amie e int varès puartât cjase un. Dai cuatri gjatuts restâts di dâ vie, trê a àn il pêl blanc e ros, e un, un pôc plui piçul di chei altris, al è dut neri. Ma propit dut. E jê e à decidût dal lamp par chel. — Tu sarâs di sigûr contente, — i motive l’amie intant che si saludin.
Si capìs che jê lu à sielt ancje par vie di so marît, ch’al à la fisse dai gjats neris. Tantis voltis no aial voltât l’auto se un al à traviersât un pôc plui indevant? O aial lassât di fâ alc dome par vênt viodût un prin di tacâ? E dut par un pirul di pêl neri! Cumò si varès ricrodût!
Rivade cjase, la femine e dismonte un tic pinsirose. In fin dai fats no à visât ch’e sarès rivade cuntun gjat. E pense a la muse ch’al varès fat il so om cuant che, juste passât il pat de puarte cul gjatut in man, il salvevite al salte di bot, cuntun stoc fuart. E nol vûl savênt di tornâ sù. Il so om lis prove dutis, al tire vie de curint in volte mo chest mo chel argagn, ma cence risultât.  Po ancje dutis lis presis intun colp. Nuie ce fâ.
Aromai rassegnât l’om al vogle la femine e al lampe il grumut di pêl ch’e à in man. — No stâ insumiâti di dî ch’e je colpe sô — e fâs in timp a dî jê cuant che un rumôr al rive dongje de cusine. Al ven di sot dal seglâr, ma prin che l’om al rivi a vierzi la puartele par viodi, l’aghe e tache za a sbrissâ fûr par sot. Un dai flessibii dal lavandin si à crevât par lunc.
L’om al cor fûr di corse par sierâ il rubinet principâl, te pocete dal bearç. Ma parsore dal tapon, par ch’al pari bon, la femine e à volût meti un vâs di rosis, un di chei pesants di ciment. Une fature a movilu. E intant ch’al procure di sburtâlu in bande si vierç ancje il rubinet dal cîl. Un slavin ch’al ven jù intun amen. L’om si imbombe intun baticei, e al sbrisse cu lis çavatis di cjase te morcje ch’e ven jù dal vâs. E intant la aghe e côr par cjase. Parât in bande il vâs si romp la jevute par tirâ sù il tapon. Par spesseâ e tirâlu sù cui dêts l’om si creve une ongule. Lu si sint a sberlâ fin di lontan, peraulis no tant bielis. Po, sierade la aghe e tornât in cjase, l’om nol rive a palesâ chel che i ven sù dret dal cûr, che si sint un murungulament çondar a rivâ dal bagn.
Ma prin di savê ce ch’al è stât la femine e je za su la puarte di cjase da l’amie par tornâi indaûr chel pirul di pêl neri cussì inocent.

di Gianluca Franco

#855

 

2 comments On Dome un pirul di pêl

  • E par cheste setemane us saludìn cuntune ultime conte di Gianluca Franco gjavade fûr dal Strolic furlan di chest an… che al à vût gust di regalânus. E o vin une conte che nus cjacare di gjatuts, sì. Chês adorabilis, maraveosis, bielissimis creaturis che a son i gjatuts cuant che a son picinins… soredut cuant che a son neris! Ce isal di miôr che puartâ a cjase une pirulute di pêl come cheste. O no? Leieit par la rispueste!

  • Ma chel puar cicin organizât a struture di gjat, sot di che piell cu la sole no colpe di jessi fodrade di pêl neri, no isâl compagn dai gjats di pêl blanc o ros. Al pâr impussibil che un colôr rivi cussi tant a distuarzi i nestris pinsîrs e azions. Lussian.

Leave a Reply to Gelo Stellato Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît