fbpx

Adalberto Daorgnani. Fiis e gnecis.

Al jere la persone plui cognossude, par dutis lis culinutis, sieradis dentri te cengle da lis nestris monts. Al jere il paron di ducj i cjamps fin dulà che une persone e rivave a viodi. Al steve intune des primis culinutis propit dopo vê traviersât il paîs di Buri, li tu jentravis tai roncs.
Il cont Adalberto no si jere mai sposât, di sigûr no parcè che nol veve vût pretendentis.
Une zornade di Istât, al jere vignût par lis vacancis di scuele so fradi Denêl, insiemi cun lui e jere une biele signorine. Che e jere a studiâ a Vignesie, ancje jê e studiave architeture e e jere alte e snele, cui cjavei bionts come il forment madûr. Cuntun portament signorîl, ma cuntun caratâr, e cu la peraule simpri pronte. Il pari i veve dât une dote di dîsmil fiorins, però i veve fat firmâ al architet che al varès vût di tornâju in vincj agns. Le veve ricognossude e legjitimade come fie la zornade dal matrimoni.
Chel amôr nol veve vût furtune: sar Denêl pôcs agns dopo sposât une dì che al jere a cjaval par lis culinis, framieç lis vignis, dongje un piçul fossalut pal scuriment des aghis de ploie, al veve viodût il cjaval lâ in stuart, al jere colât e al veve rot il vuès dal cuel e li al jere restat sec. Muart intun colp.
Taresie la femine dal architet, e veve parturit une biele frute, ma par vie dal part i veve vignude une infezion e cun chê e jere muarte dopo pôc. L’architet e la sô femine, a vevin bielzà pensât ce nons meti. Un mascjo lu varessin clamât Filippo e se a fos stade une femine le varessin clamade Ada.
Ada e jere une frute biele come sô mari, ma ducj i disevin che e tirave de bande dal nono materni: e someave il nono Vincenzo. Chê biele frute lu veve fat tornâ zovin, no jere une novitât cjatâlu a spas cun sô gnece pes stradis di Udin o a viodi lis corsis dai cjavai. Vincenzo al jere cambiât come il dì e la gnot. Al jere simpri cun muse di ridi e se ti cjatave par la citât si fermave a cjacarâ; dutis robis che al jere da mo che nol faseve. Intant il timp al coreve simpri plui svelt e i agns daûr di lui.
Ada a la etât di disevot agns e jere deventade une biele signorine e e someave dute sô mari, ma tant viziade che e jere a lâ a scuele no jere tant brave, e cuissà che no vedi vût ancje cualchi aiût dai siei insegnants. Ae fieste dal complean, e veve cognossût un siôr di Flumisel che dal moment che le veve viodude no le pierdeve di voli, e aromai al jere un ospit fis a Roccalpiano, fintremai che al veve vût il benvolê dal cont Adalberto.
Cussì a disenûf agns Ada si jere maridade cun siôr Michelin Ricardi di Flumicel.
Ada e veve metut al mont tre fruts, il prin nassût Renzo, dopo trê agns e jere nassude Marianna e par ultime Caterina. Cuant che i fis a jerin rivâts a la etât di disevot agns a vevin fate la scuele superiôr li dal Stellini di Udin e daspò a jerin ducj lats a la universitât a Vignesie. Siôr Renzo al veve simpri cualchi probleme mentâl di tipo neurologjic e par chel nol veve podût lâ a scuele come sôs sûrs. Il matrimoni cun sior Riccardo no i veve mai plasût a Ada, cussi cuant che lis fiis a jerin ladis a scuele a Vignesie, Ada a jere tornade a cjase sô a Roccalpiano, Marianna che e jere la fie plui brave, e jere che che e someave di plui al Cont. E veve cjatât un murôs tant siôr e ancje un brâf student in leç: al studiave par deventâ avocât. Cul timp si madressin ancje i piruçs, dopo la muart dal Cont, Ada si ere separade dal om e jere lade a vivi in trentin propit par no sei cognossude. lis fiis a vignivin a Roccalpiano une volte al an, juste par cjalâ il resocont dal fatôr e viodi trops beçs che ur tocjavin.

di Plume di Ingjustri

2 coments On Adalberto Daorgnani. Fiis e gnecis.

  • Achì in osterie o pensavin che e fos finide, la storie dal Cont Adalberto, ma lis storiis, intune famee, a son tantis, che si disvilupin e van di ca e di là. E alore, ve chi, che la nestre Plume di Ingjustri nus à sorprendût cuntune altre storie che e zire ator di chest fantomatic Cont di Roccalpiano. Dute par voaltris, cheste saghe familiâr che e somee ancje masse familiâr, par come che a van sucedint lis robis.

  • Da biele conte di Plume o ai capît che ancje daûr lis puartis des cjasis dai siors al è platât il ridi e il vaî, il ben e il mâl , e a seont indulà che le scove a pete, un dì tire fûr il ben, e un dì il mâl. Lussian.

Scrîf un coment

This site uses Akismet to reduce spam. Learn how your comment data is processed.

Site Footer

%d bloggers like this: