fbpx

Travuart eclesiastic


Pieri al jere il plui grant coridôr di Gjalarian. Lui e la sô biciclete a jerin une robe sole, un sôl cuarp. Ancje parcè che al veve dome chê (nol jere un cun problemis di siôr). Clap, clap, clap, i batevin lis mans in paîs. A disevin che a mandâlu al Tour de France o al zîr, chei altris curidôrs ju varès cuinçâts come la salate. E no jerin tristeriis!
Al partive di domenie matine, vistût cuntune tute di lane che i veve fate sô mari, gugjade intun toc sôl, di pîts a cjâf, in celest fosforessent, cuasi blu. Al partive e al leve sù fin in mont, pedalant come un mat sui soi sghirets secs, ma ancjemò bogns di sburtâ. Di cuant che al veve scuviert la magjie dai boscs, dal soreli che al piture fueis sul asfalt, intant che lui al pedale come il plui grant dai scjaladôrs, nol rivave a fâ di mancul di lâ sù. E tant al jere babio di rive su, tant al coreve di rive jù, intun agâr che al viodeve dome lui.
Si lassave lâ, pontant i voi sul manubri de biciclete, cence distrazions, a 50 – 60 – 70 – 80 a l’ore. Une saete celeste che e straviersave ducj i paîs de Cjargne.
Al veve fat cussì ancje la dì di Pasche. La Vierte e sdrondenave di vert e butui in semence, di flôrs e di cisilis. Ma Pieri, cjapât de disese, al viodeve dome il so manuvri. Fintremai che une mariutine no vaie a poiâsi li parsore!
“Ma che al sedi vere che lis mariutinis a àn siet balutis neris su la schene?” si veve domandât Pieri. E nol vevie tacât a contâlis!
Curve!
Muret!
Puarton!
Curve!
Arbul!
Machine!
Curve!
Rodolon!
E ve che une glagn de tute e reste ingrampade intun claut…
E inmò un rodolon!
Curve!
Rimbalzâ!
Mûr!
Cjavrûl!
Arbul!
Puarton!
Cjampanili!
Scjalinade!
Zago!
Plevan!
BUM!!!

Pieri si ferme nuie mancul che parsore dal altâr de glesie di Ravasclêt, a mieç di Messe Grande.
Plen di pachis e scussadis.
Crot.

di Rafaêl Serafin

 

3 coments On Travuart eclesiastic

  • E velu chi il moment che o spietavis! Inte sfide dai dadui a son stadis presentadis, in forme di prototip, lis Cjarticontis, e l’ostîr al à provât – tant che un houdini leterari – a cimentâsi inte sfide di scrivi une conte dilunc de serade, su lis cjartis che Aghul, il fi de Coghe, al à tirât fur dal maç. A chi sot o podês viodi lis cjartis che i son capitadis. E te imagjine l’origjinâl de conte scrite. E sicome nol jere content, se sês babios, o cjatarês dentri te conte ancje une citazion dai titui des altris contis letis inte serade (fûr che une, che nol à rivât a meti, scuvierzeit voaltris cuale)
    Il titul? Nol à vût timp di pensâlu. Leiêt la conte e proponêtlu voaltris!
    E soredut, viodêt ce ben che funzionin lis cjarticontis!

  • No soi rivât a cjatâ;SECS MA BOGNS e PROBLEMIS DI SIÔRS .Pal titul se Pieri al è finît sul altâr, al fasarès un grun paronance chel di ” TRAVUART ECCLESIASTIC” Lussian

  • Alore, intant o domandi scuse che no mi jeri inacuart che par un probleme informatic la conte jere jessude mâl. Par fortune che la sartore si je inacuarte subit e e à comedât. Podopo, brâf lussian. Tu mi âs visât che te seconde version che o vevi tacât a ricopiâ o vevi zontât une frase par meti dentri ancje i problemis di siôr. Secs ma bogns invezit no vevi rivât. Tu sês une bolp! E bielissim il titul!

Leave a Reply to Anonim Cancel reply

This site uses Akismet to reduce spam. Learn how your comment data is processed.

Site Footer