Vendi scovis (a S.)

Une volte a rivavin a S. ancje dîs puars a la volte e la famee di mê none, che e jere piçule, no podeve dâur di mangjâ a ducj. Un di lôr al faseve il rufian e al cjantave une filastrocje a mê none bisse: “Parone, parone, un plat di pastesute ben cuinçade, parone, parone…
Se i leve ben i devin un plat di zuf.

Bon. Chê altre dì o voi jù tal cjasâl in biciclete e o sorpassi un marochin che al vent scovis.
O rivi li di mê none a S. e le visi.
“None… al rive un a vendi. Dulà isal il nono?”
“A travasâ tal camarin.”
“Bon. Che al resti là. Se al viôt int foreste le pare vie cu la forcje, come cun chei di Gioàva…(Geova)

Il marochin al rive. Nol è un marochin ma un tunisin. Al tabaie ancje furlan. Al varà cincuante agns. Al è simpatic. Al fâs il rufian.
“Fûr bêçs… cence bêçs…” al cjante.
Nus conte che a Biserta al à lassât la femine e dîs fioi, che là nol è lavôr, a son ducj corots e vie indevant. Saraie vere? Po dâsi, intant jo i compri une scove e i lassi dîs euros, dut ce che o ai in sachete.
Mi soi impensât a chel puar de filastrocje che mi contave mê none… come se al fos tornât, po…
Il tunisin al va vie content e mi da ancje une benedizion.

“Toni… cui le bêf la tô storie? Se tô none e je muarte dal 95… to nono dal 97 e il cjasâl al è bandonât…”

di Checo Tam

2 coments On Vendi scovis (a S.)

  • E di cheste conte al Contecurte Day, al vignarà fûr alc di grues. Cuissà, un brevet, un prototip, un robot…. ven a stâi che ducj si visaran des famos Scovis a S inventadis a Sclaunic, cuant che lis dopraran par gjavâ vie lis telis di rai dai cjantons plui disperâts de cjase. E cui le à inventade, se no il nestre fidât famei, che come par solite al cjape simpri gust e meti tes sôs storiis intervents che a vegnin di fûr e i cambiein il clime e ti fasin colâ dut ce che tu crodevis fin ta chel moment.

  • Simpri fuart il Checo, intes sôs contis cussi ben intorcoladis, che ti sbatin intun zirevolte di ca e di la come lis gjostris a ciadene di tancj agns fa . Lussian

Leave a Reply to Gelo Stellato Cancel reply

This site uses Akismet to reduce spam. Learn how your comment data is processed.

Pît di Pagjine dal sît