fbpx

Une staiare

Angjelin,dopo cene al spietave il fresc de sere; si sentave fûr de puarte par cjapâ sù la fisarmoniche, e al tacave cussì: Tintine tintone cui balial lassù, son predis son sioris, si tratin dal tu. Prin a scomenzarin i fruts dal paîs a presentâsi sul puarton e dopo, un pôc a la volte, il curtîl di Angjelin al deventave une piste par balâ. Cuant ch’al sunave insieme a lis notis si misturavin ancje i pensîrs di un om bessôl, che al veve aromai imparât a lavâsi lis cjamesis.
Tal curtîl dut al veve un so ordin e si podeve fa un zîr di staiare cence inçopedâsi. I plaseve viodi la int contente a cjantâ e balâ tal so curtîl, preparât cun cure par chel. Al scomenzave dopo Nadâl a sunâ tal cjalt dal fogolâr par vê libars i dêts di cori sù e jù cence falâ. Sêstu pront, i disevin chei, cuant ch’a lu viodevin. Us speti vulintîr al rispuindeve.
Il mandi di Anute lu spietave vignint fûr di messe. E dopo ognun pe sô strade cence tantis comediis, cussì i vevin insegnât a tratâ i afiets.
Anute e balave cussì ben cunTite, come se a fossin sposâts; no si trate di movi dome lis gjambis a timp, ma dut il cuarp al cjape ligrie…afiet… desideri… intant, Angjelin si contentave di sintî il profum di Anute cuant che il zîr di staiare al permeteve. La cotule lungje e lizere e mostrave un cuarp ancjemò zovin e plen di vite, e Angjelin alore si pierdeve a cjalâ plui in sù de tele.

Une sere, tal moment di polse, al sta par jevâ de cjadree e poiâ la fisarmoniche cuant che Anute e rive sburide e i dîs: parcè mi cjalistu cussì?
No sai, al rispuint di bot e subit daûr: ti cjalavi che tu slungjis masse il pas tal zirâ…
E alore insegnimi tu, cemût che o ai di fâ!
Une man la poie sot la palete drete di Anute e la man çampe ta la man di jê. Al scomenze a dâi il timp cjantant sotvôs la staiare.
Al prove a strenzi Anute a planc dongje di se… a sintî il so profum… il clip dal so cuarp sul stomi… al sintì bati il cûr cence regule e plui svelt di simpri.
Angjelin a son dîs agns che o spieti di balâ cun te!

di Gaetan Cogôi

3 coments On Une staiare

  • E cui al è rivât secont al Contecurte day di Sclaunic? Nuiemancul che un di Sclaunic! Il nestri bravissim Gaetan Cogôi cuntune conte sclete, e semplice, plene di musiche e di sintiments. E che daûr di une storiute di nuie, in realtât, nus insegne une vore di robis su la vite, e il dî e il no dî. Dute par vualtris cheste staiare!

  • Ooohhh finalmentri une conte che e va a finî ben 🤗

  • Trop biele che conte, senari reâl dai timps di une volte, cuant le timidece no permeteve di lassa la fûr i desideris interiors, se no vignivin sburtâts da lis notis di une armoniche,cu le complicitât di une puare piste di bal improvisade intun curtîl come che cheste biele conte e conte,e lassâ che i sens purtassin in puart i desideris platâts di ducj doi .Compliments a Gaetan. Lussian

Scrîf un coment

This site uses Akismet to reduce spam. Learn how your comment data is processed.

Site Footer

%d bloggers like this: