I dîs piruçs

Pûr jessint confinants, Checo e Jacum no jerin mai lâts di acuardi. Anzit. Al someave propit che ognidun di lôr al fasès a pueste a cirî un mût par barufâ, cuistionâ, berlâsi l’un cun chel altri.
A vevin dut tacât: lis cjasis, lis stalis e ancje il mûr dal ledan. Dome i doi orts a jerin dividûts di une fereade aromai rusine e scancarade che si fermave prin di rivâ dongje de stradele dal Boschet, indulà che a jere la prove sigure che il diaul al esisteve.
Di fat, la besteate cui cuars a veve metût propit sul cjanton comun un piruçâr, plantât cuissà trop timp indaûr. Crodêtmi che un bon voli che al travuardave dal spiç de fereade, al podeve di sigûr dî che l’arbul al jere mieç di Checo e mieç di Jacum.
Fat al stâ che un biel dopomisdì, su la ore che ancjemò je fate pe polse, o jeri colât dal jet, sveât di bot dai vosaments che si sintivin di fûr.
— Cumò ti copi, brut maladet! — Al vosave Checo cui voi scocolâts.
— Une altre peraule e ti tai il cjâf! — Al berlave Jacum, vongolant par aiar la manarie.
Svelt o ai corût jù pes scjalis e, intun marilamp, mi soi cjatât a sburtâ e comedonâ la int, che si jere intant ingrumade ator dai doi, par viodi cui che la varès vinte.
— Cheste volte tu larâs al Creatôr! Scomence a preâ!
— Tire fûr la casse che tu âs sot dal jet. Tu la doprarâs dal moment!
Ducj a cjalavin par aiar, pontant il voli sul fueam da l’arbul.
— A jerin dîs piruçs su l’arbul. E cumò al mancje un!
— Mi dâstu dal lari? Ti insegni jo…
No savint cemût sbratâ la cuistion, o vevi cjapât coragjo e o vevi vosât a plens polmons.
— Chest piruçâr al à simpri fat piruçs cetancj che a son i dêts des mans! Sêso di acuardi?
— Si! — A vevin dite Checo e Jacum, intune vôs sole.
— Cjapin alore un volontari. — O jeri lât indenant. — Berto, tire sù lis mans e ducj achì ator contin a vôs alte.
E cussì, pôc dopo, il trop de int si jere disfat e ducj a jerin lâts a cjase contents.
Ancje i doi contendents.
O vevi fat a pueste a clamâ Berto, savint che di zovin, al veve pierdût un dêt tal trince.

di Massim Furlan

2 coments On I dîs piruçs

  • Altre conte dal Contecurte Day. E cheste je di un che dai plui grancj nestri fan e che nol podeve mancjâ, E difati vele chi la sô conte e come che dispes al à fat cun altris contis, soredut dal nestri amatissim Rocheton, ancje chi al met dongje une barufe par fanûs fâ une ridade. Dute di lei, insome… la vuere dai piruçs!

  • Massim, furtune che le trince e veve cjonçât un dêt a Berto, se no Checo e Jacun e davin aiar a une tierce vuere mondiâl. Simpri plasevulis lis tôs contis a meti soreli in chescj (dîs) di ploie .Cence volelu mi à colât un dîs ancje a mi. Lussian

Scrîf un coment

This site uses Akismet to reduce spam. Learn how your comment data is processed.

Pît di Pagjine dal sît