Un numar

Dîs.
Un numar, une sigurece, un principi di vite, une ossession.
No podin sucedi robis brutis se tu sês fedêl. A sucedaran se no tu lu rispietis.
Dîs a àn di jessi lis robis che tu metìs tal carel a ogni spese fate. Dîs i minûts di cuei la pastesute e chei doprâts par cagâ. Dîs lis pagjinis di lei in dî o pûr dîs i dîs par finî un libri. Dîs i scjalins di fâ, e magari tu scugnìs saltâ un o fâlu dôs voltis. Dîs i pârs di mudantis tal scansel, dîs lis cjamesis picjadis, dîs i bêçs tal tacuin o i macarons tal plat.
No tu ti visis cuant che tu âs tacât. Forsit di piçul, sui dêts de man, forsit cuant che tu jeris za canai e tu contavis penis e lapis tal astuç. Tu ti visis di vênt robadis o regaladis, par che il cont al torni.
E nol è facil sei un ossessîf compulsîf.
I vûl sistematicitât, calcul, braûre. I vûl sei babio par proviodi i bêçs dal rest de camarele o i pîts di savôrs che tal ort a cjaparàn. I vûl coraç a butâ vie alc che tu i tegnìs o proviodisi di alc che no ti covente.
E no tu cjalis in muse leç, morâl, bonstâ. No tu cjalis in muse a di nissun, e in pôcs a capissin.
No ti capìs Cornelio, che ti invide a bevi un tai – e no dîs – e alore lui ti met devant une tace vueide, par che un e zero a fasìn dîs.
No ti capìs Colastiche, che ti coione parcè che i garofui no si regalin in numar pari e dopo si ufint parcè che tu i dividis in doi il mac, che tant Ve chi, fantate, cinc e cinc!
No ti capissin cuant che tu tuchis te puarte cussì a lunc, cuant che tu fasis cetantis manovris par parcâ la machine o tu butis tes scovacis dôs caramelis dal pacut.
Tu contis disperât lis stelis, la gnot, dîs ae volte.
Se almancul ti fos capitât un altri numar, tu pensis. Un numar plui piçul, plui gjestibil.
Ma ti è capitât il dîs e aromai tu i vueilis ben. Da rest, ti podeve lâ ancje piês.
A Tarcisio, par disi une, i è capitât pi greco!
di Rafaêl Serafin

3 coments On Un numar

  • E cheste invezit, la seconde conte dal sfuei.
    Ancje cheste a teme cul dîs de serade, dulà che il dîs al devente adiriture une ossession. No si vîf ben cuant che un numar al devente la tô ossession. Ma bisugne stâ atents… al è simpri cui che al sta piês.
    A voaltris ancje cheste conte che no partecipave al contecurte day, ma al jere come se.

  • Jo soi nassude il sîs dal sîs, forsit il destin al voleve dimi alc?

  • ç’ ustu savè, stralunade, jo o soi nassut il 4 dal 4 19 40 ( cjadreutis) e inte vite soi simpri stât strac, e o lavi simpri a cirî cjadreis par sentami.

Leave a Reply to Stralunade Cancel reply

This site uses Akismet to reduce spam. Learn how your comment data is processed.

Site Footer