«Conte, se no tu mi crodis!»
«Dîs po! Mi stâtu coionant? No viodistu trop che al è picinin?»
«Al baste che tu lu stricis un pôc».
«Parcé?»
«Cussì tu viodis che al slargje lis çatutis e si rive a contâiu ducj».
Sgrimie e tire fûr de gabiute la bestie e la ten adalt.
«Planc eh, che son delicâts», i dîs Grubian, prin che lu strenzi jenfri doi dêts.
«Une, dôs, trê, cuatri, cinc… di une bande, eh… Ruscli Catùs! Tu vevis reson! Al à dîs dets!»
«Viodût? Ce ti vevio dit! Dîs tes çatis denant e dîs ancje ta chês daûr!»
«Mai viodude une robe compagne! Ma cemût âstu fat a cjatâlu?»
«A dius, facil! O jeri a torzeon, o ai butât un voli a Tiere e al jere plen. Crodevi che a fossin piceçucurundui e invezit al jere chel robul alì».
«Bielonon! Mi plasarès vê un ancjea mi!»
«Pardabon? Alore doman o torni di chês bandis e ti cjol un!»
«Fasarestu chest par me?»
«Ce discors! Sestu o no sêstu la plui biele rindulute dal planet!»
E cun chê, Grubian i molâ une bussade sul mustic a la sô morosute, al montà su la aeronâf spaziâl, e scjassant lis mostacjis e la sô codute di 150 metris, al bandonâ, par il moment, il sisteme solâr.
di Rafaêl Serafin
#823
3 comments On Rindui
Lu savês che a Contecurte si vote, e par votâ bisugne alçâ la man. Ma ce brut, al à pensât l’ostîr doi trê dîs prin, di alçâ la man vueide. Bisugne meti alc, ce saio, un sfuei di cjarte. MA parcè no regalâ une conte o dôs, scritis su chel sfuei, di lei intant che la int e spiete? E ve chi. O scomencin la setemane propite cun chestis dôs contis. Cui che al è stât a la serade al varà magari tignût di cont lis dôs contutis, scriti di buride doi dîs prin e metudis adun de coghe dilunc dal 25 di Avrîl, a Pradaman, intant che ator di jê ducj a bevevin e fasevin fieste.
Cheste e je la prime. E a cjacare di… Rindui.
E no savin se je vere o mancul, che gerbillo par furlan si dîs rindul. Une coionade saltade fûr ae cene dai dîs agns. Cualchidun al veve di scrivi une conte, sui rindui. E ae fin, i tocje simpri al Ostîr, cuant che si trate di fâ il stupit.
A voaltris… Rindui!
O hai fondût l’ordenadôr par cirî le peraule RINDUL, e dopo o hai cjatât, pensait voaltris, che no si trate nialtri che dal “purcitut de Indie” come che ju clamavi di frut, poben us disarai che an vevi un batiât Vigji, e ogni volte che ji vosavi ” riit Vigji” al vierzeve le bocje mostrantmi i dincj, daûr compens di un bagjgi. Benpo, benpo, ogni dì si fâs la lune e ogni dì si impare une, simpri gracjs chest cjantonut di contecurte. Lussian
Aaah ce biel il rindul! Ce ninin! Di frute o varès volût tant vêlu ma no mi lu an mai cjolt, nol è just!