Invier e Vierte

Barufâ e dopo fâ la pâs… O ai reson jo, no o ai reson jo, no jo! E dâti reson dome pal plasê di rindimi, di pierdi une bataie che no m’impuarte, bataie di une vuere mai scomençade. Vincile al vorès dî pierditi, ma ce che o vin al è tant plui grant di cussì, che e baste une ridade par che la bataie si sfanti intune schermade d’amôr. Rindisi par vinci, crevâsi come  il glaç di un riul par ch’e torni a cori la aghe.

Ven cun me, tu mi disis, o vuei fâti ce che la Primevere e fâs cui cjariesârs. Cussì al diseve Neruda il poete… ma tu che no tu sês poete, tu sâs dome che mi plâs e tu m’al disis un pôc scherçant, par gust di fâmi ridi. E cussì ridint tu mi puartis ta che altre stanzie, là che nol jentre mai nissun, dome nô doi.

Mi plasarès par une volte, une volte sole, sintî ce che a sintin la tô lenghe, i tiei dêts cuant che mi sgarfin. Mi plasarès une volte jessi il gnerf che al vibre par dut il cuarp fin dentri al to çurviel cuant che o fasin l’amôr. L’ormon che al rimbalze tal to cjâf, che al sclope come i fûcs dal prin dal an, e ti cor jù pal fîl de schene come une faliscje… une volte sole…

Dopo mi plati tal cjalt dai tiei braçs, o poi il cjâf su la tô spale. O cjali il sufit e no viôt, ma o sint il cîl frêt di nêf la di là, o soi come in trance ma cui voi spalancâts. O viôt ogni piçule robe te stanzie: une rose secjade ta un vâs su la ultime scansie adalt, la cuvierte di un libri let a mieç, poiât cu lis pagjinis par jù sul comodin, sul tapêt i blue jeans un pôc fruiâts, cuasi imberdeâts pa la premure di gjavâju…

O sint dut, ma tu cumò no tu mi cjalis plui… ce sêtu daûr a pensâ? No sai parcè che tu vâs vie, i tiei pinsîrs di colp a son masse lontans par me. Cumò l’Invier nol è plui dome fûr, lu sint tai vues e no ai nissun puest dulà platâmi. No sai là che tu sês… Ma se l’Invier al è chi, puedie sei lontane la Vierte?

di Stralunade

#819

3 comments On Invier e Vierte

  • E no vino di publicâ une conte ancje vuê? E in chê stagjon chi, di cjalt e di frescot, che si è a miezis jenfri il timp dulà che la nature e polse e si sa che al rivarà chel dulà che dut si svee, ve chi un conte une vore delicade de nestre Sartore de Osterie… Nol è facil, a disin in tancj, doprâ il furlan par il teme dal amôr e dal romanticism, inmò mancul par dâi a une storie une plete erotiche, cence scjade in tal masse sempliç o tal ridicul. E cheste conte, invezit, e je chi par mostrâ che si pues, e la robe e ven fûr plui che ben!

  • Biele le conte di Stralunade, indula che cence pei su la lenghe e miezis misuris, e puarte in lûs le veretât plui grande de vite, che ducj si cîr di scuindi, e no sai il parce, le primevere che vinç l’ inviêr, le pâs su le baruffe, e le continuazion de vite su chest tarondel di tiere cul soreli content a judale.Compliments a Stralunade che in forme plasevule,semplice, delicade, à metût adun une conte cussi biele. Lussian

Leave a Reply to Anonim Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît