Un mês dispendiôs

Nol è nuie di ce. A son tancj i fruts cui ocjâi, ma lôr no sal spietavin. Il lôr frut blanc e ros come un bombon. Impen il primari dal grant ospedâl di Triest ur al dîs a clâr ch’a son problemis impuartants. — Ma isal sigûr?
— Chestis gnovis machinis no falin. Cui fruts piçui, si sa, nol è simpri facil capî, ma cu la gnove tecnologjie si va sul sigûr!
Pari e mari si cjalin. A son displasûts. Che po a fâ un pâr di ocjâi a son ancje bêçs, migo bagjigjis. Par sorte il frut le cjape ben. Al pâr dibot content di tignîju sù. Al fâs cualchi bocjate ogni tant par sburtâju sù pal nâs, ma si sa, al à dome trê agns: il nasut si viodilu e no si viodilu. Nol è un nâs par tignî sù ocjâi. Un mês. Po si à di tornâ par fâ un’altre visite.
Ma dut al pâr lâ ben. Fin tal doman di sere. Cuant che il frut, ch’al zuie cuntune balute dentri cjase, al partîs di corse e al va a trussâsi dret tal spiç de madie. Come che no le ves viodude. Une pocade ch’e fâs trimulâ dute la cusine. Vaiudis, sanc ch’al spissule e i ocjâi crevâts par fûr. Pari e mari si cjalin: ma isal dabon cussì seriose la cuistion? E vie li da l’ocjalâr a justâ i ocjâi. E fûr altris bêçs.
Cualchi zornade plui indenant al sucêt il prin câs. Cuant che la matine la mari e va a vierzi i scûrs te cjamare dal frut s’inacuarç che i ocjâi no son sul comodin come simpri. E no son sants di cjatâju fûr. Par altri no si pues bacilâ plui di chel tant, che si scuen lâ tal asîl. Cemût fasaraial cence ocjâi? Là laraial a trussâsi?
Ma il frut al torne cjase content. Nissune pocade. Par un câs i ocjâi a saltin fûr dal sac des scovacis che si romp tal puartâlu fûr. Cemût sono finîts là dentri?
— Ce isal chest rumôr? — al dîs il pari cualchi dì dopo. Come di alc ch’al sgresee. Al ven dal garâs. Tal so bancut di lavôr, compagn di chel dal pari, ma plui piçul, il frut al à sierât i ocjâi te smuarse e cul seghet al cîr di seâju a mieç. Dutis lis lints sgrifadis. E vie indaûr dal ocjalâr.
Une setemane dopo il frut al côr cul so biroç tal bearç. Un saltut plui fuart suntun balot e i ocjâi i sbrissin par tiere. Prime che il pari al rivi a cjoliju sù il frut al è za tornât indaûr svelt e ur à passât parsore. A restin di lôr nome che fruçons di veri.
Il pari al è convint ch’al vedi fat a biele pueste. E l’ocjalâr al è content di viodiju indaûr.
Par sorte il mês al passe. La gnove visite. Il rideç dal primari. Il frut nol à plui nuie di nuie. Un vêr miracul! Mai sucedût prin, ur motive. Ma il pari, cui sa parcè, nol è content. Al à une sbisie di fâi savê a chel primari, magari parantti fûr chei dincj fals ch’al à, che lui no ur crôt ai miracui.
E nancje a lis gnovis machinis.

di Gianluca Franco

 

2 coments On Un mês dispendiôs

  • O sin al prin di avrîl, e o tachin la setemane cuntune corte scherçôse che nus regale il nestri Gianluca Franco, gjavade drete drete dal strolic di chest an. No covente metis i ocjâi, par leile, o forsit sì? Viodêt voaltris… dal sigûr, se us capite un frut come chel de conte….

  • Le storie dai ocjai di Gianfranco mi à fat vignî in ment le “domenica del corriere” di tancj agns indaûr, indula e jerin reclamizâts ocjai cul pode di viodi sot i vistits des feminis, Vigji brumbul ju veve comprats, ma par viodi le bande scuindude al’ à dovut maridasi. Lussian

Scrîf un coment

This site uses Akismet to reduce spam. Learn how your comment data is processed.

Pît di Pagjine dal sît