La dì prime le none Sunte e veve preparât le “liscje”, po cul jutori de gnagne Rine e veve resentât chê blancjarie, biele blancje, sflandorose apont, par vie de cinise, altri che il “Dash” e cumò e faseve biele mostre di sè une volte metude a suiâ.
Cussì Sunte tor lis dôs dopo misdì, le veve palpade, e jere scuasit sute, tor les cinc e varès ritirât i bleons, che a saressin stâts pronts par sedi sopressâts…
Ce biele zornade, e pensà, stant che îr al veve plot dut al dì, cence remission.
Ce vûstu di miôr Sunte, si diseve tra sè e sè, no veve fat i conts cun chê ribaldarie che e jere saltade fûr dal borc di sot ,cul balon in man par zuiâ tal mieç de strade, in chê volte une strade blancje.
Nuie pôre, le furgonete de pieçamente di Amorino e sarès tornade a cjase tor sîs di sere, no prime, duncje nissun al varès disturbât chê partide di balon.
Nissun altri? Mmmm…
Le none Sunte, tornade dai siei lavôrs dal ort, e jere li par dâi ancjemò un cuc ai sei bleons, che cumò a vevin ca e là bielis placis tondis di pantan.
Nancje il timp di maraveâsi che une lastre de cjase e leve in mil tocs, po il balon al finive propite denant dai pîts di Sunte.
Noaltris fruts o jerin li denant de reêt metude a cunfin, o jerin spierdûts come pioris… le vevin fate gruesse, intun mari lamp o vevin capît che le partide e jere finide, par cheste setemane e forsit… ancje par chê altre…
Carosello nol jere ancjemo rivât tes nestres cjases, chê sere o jerin lâts su a durmî cence tantes fufignes e, soredut, cidins cidins…
di Maurizio Di Fant
#809
12 comments On La partide di balon
E tornìn ai regâi pe osterie, che a son ancjemò tancj e daûr a rivâ. Induvinait cui che al torne a cjatânus? Dret from San Denêl, il nestri Maurizio Di Fant a ven dongje a contânus une, ispirât dai dadui e dai bleons di Sunte. Che cuissà ce fin che a fasaràn… Lei par scuvierzilu!
Compliments a Maurizio , che cun che biele conte al à disoterât dal dentri di me chei biei ricuarts di zoventût, cuant le strade blancje di tiere masanade dai cjars a ruvuede dure tirâts des vacjs jere dute nestre, par doprale a zuiâ di balon, di lipe, di cavalete e v. i. ,( unic ostacul e jere la balilla dal siôr dotor ch’al passave ator lis nûf batudis dal cjampanîl,) cuant insom dal curtil fumave le lisiarie, cuant le none racomandave di lavâ i pits intal riuç prin di lâ durmi par no sporcjâ i bleons penis lavats, cuant il timp si doprave daûr il cori dal soreli ,da lis stelis, e cuant si scjafoiavin lis preocupazions sul “sarà ce che Diu vorà”. compliments di gnûf Maurizio e fati sintì plui spes che mi plâs tant lei le to vene di scrivi
Graciis cjâr ami “cence non” ma no cence sintiment e cence cûr. O stoi lavorant a une gnove fadie leterarie, dopo “I Tesaurs di Aquilee”, chest an e son doi mil e dusinte aiins de fonde de citât, e viodaran le lûs “I tesaurs di Cividât”. O soi a bon pont, come che si dîs: tal mieç de aghe.
Presentazion, a Cividât, cuant ancje mo no lu sai…
Mandi Maurizio, tu sês propit bräf. E o si content di leiti su Contecurte. Speri di lei ancjemò tos contis. intant cui sà che no mi tornedi l’estri di tornâ a scrivi ancje jo.
Maurizio perdonimi, il judisi su le to conte lu ài fat jo, lussian, purtrop le dismentie e scomence masse spess a vignimi in cjase
Dismenteavi. L’anonim al è di sigûr Lussian. Tal comun di Basilian Luciano Marinig
Biel però no ai capît ce che e je le furgonete de pieçamente.
Stralunade, le furgonete dal nestri Amorino e jere cjamade come un scus di stofis e botons, ribatins e gusielis, fîl di ogni sorte, dut par meti adun vistîs, tendis, bleons, tovais, scarpets, ecc.
Grassie
Mandi Lussian al secolo Luciano Marinig di Pasian Schiavonesco…
Maurizio, prin di dut o ài di fati i augûrs sul to gnûf lavôr “i tesaurs di Aquilee”, e dopo o viôt che tu sês ben documentât su le storie dal nestri comun cul non di Pasian Schiavonesco fin al 1922.Ti zontarai che ancje Varian al jere sorenomenât “Varian del bosco” par une folte plantagjon di arbui di ogni fate fintremai cuasit a rivâ Basilian. Lussian.
Lussian, dut une vore interessant, di fat le nestre grande storie culture nus conte di un Friûl che dopo le distruzion de citat di Aquilee al jere stât bandonat e il grant lavôr durat seculorums par meti adun le centuriazion al je re lât in part pierdût, il teritori dal medi e de basse a si jere rimboschît… Ma cheste si volês a je une altre conte…
Dut vie, i Tesaurs di Aquilee e son jessûts dal 2016 il 12 di lui e chei di Cividât e an di jessi, come co disevi no sai cuant… Maurizio