fbpx

Il bosc di Vico

Il bosc di Vico al jere plen di cjastenârs, e la stagjon e veve za madressât lis cjastinis. Chest bosc al jere a confin dal curtîl dai Mions indulà che a vivevin trê fameis. Cuatri frutats di chestis fameis, il Bobo, Strighie, il Tate e il Puti si jerin aleâts intune bande par fâ dispiets, come che si usave in chei timps di dopo vuere.
Di un pâr di setemanis a studiavin un plan di atac a chês cjastinis: nol jere facil, Vico le veve nasade e no passave ore che nol vuardeàs il bosc. Il Bobo, come capo bande al pensâ di petâiale di domenie matine a scûrm cuant che Vico al jere sigûr a durmî, e cussì al fo decidût.
Dentri dal bosc al jere un scûr come in bocje, framieç dutis chês plantis al tocjave lâ a palpe, cenonè rivâts sot il cjastenâr plui cjariât, a larin sù, il Bobo,S trighie e il Puti, il Tate sot al varès metût intal sac lis cjastinis che lôr a scomavin, la robarie e leve cussì ben che no i pareve vere, se nol fos stât che dut di bot al saltà fûr Vico cuntun racli in man! Il Tate al scjampà vie come un jeur sclopetât, il Puti al saltâ jù par i ramaçs come une simie, il Bobo e  Strighie no rivarin.
E chi e scomençà la danze: Vico messedant il racli par aiar al vosave: “Vignît jù!”
Al rispuindè il Bobo: “va vie tu!”
Dopo une mieze ore di conflit verbâl, Vico si sentà sot il cjastenâr a fâ la spiete, o prin o dopo o vês di stufâsi, al disè, e lis oris a passavin e il soreli al jere za alt, e il Bobo al sintive chê spinte corporâl che in ogni cristian si presente di matine, e ancje si presentave cuntune cierte prepotence, dovude forsit a chê triple razion di ‘suf mangjât le sere prime. Sta di fat che al pensà a fa di jê une arme.
Disore di dulà che al jere sentât Vico, un gruès ramaç al faseve cjavine, il Bobo si metè in juste posizion di sbâr su di chel ramaç, a bregons calâts, e cundute la fuarce de basse corporâl al sbarâ fûr un licuit maron che al invadè dut il vistît blanc a la De Pinedo dal puar Vico. Dal cjapiel si viodè colà jù a pitinton dut su la cadope e su la muse inferocide di Vico che al scugnî, cuissà parcè, bandonâ il puest di vuardie.

di Luciano Marinig

5 coments On Il bosc di Vico

  • Ma crodeviso che a fossin finidis, lis contis? No ve! E us disarai di plui… al è un contecurtâr che une volte scrite une al à signorsì volût une altre schirie di dadui! E cui podevie jessi se no il nestri Lussian di Varian, che al à sielt la ironie, e neancje tant fine, par fânus fâ cuatri ridadis. I ingredients? Un cjastenâr, cualchi frut che al à chê di gafâ cualchi cjastine e dopo… e nuie, dopo scuvierzeit voaltris 😀

  • Che altre dì o soi passât par chel bosc, ormai al è restât pôc e nie di lui, i cjastenars secjâts di tant timp, e pocjs plantis restadis in ca e in là, però o ài podût viodi che sot dal cjastenar di cheste storie un trop di violutis al ven fûr ogni an, come mi à ancje confermât il gnûf paron,e propit indula al jere sentât Vico, si viôt che le colte naturâl e jere un grum buine. E saress di fa un pinsîr su le concimazion de blave,cence doprâ chei concimps chimics di vuê che copin lis afs.

  • Le dismentîe a bracet de vecjaie no mi bandone: il cpment culì parsore al è gno. Lussian

  • Mandi Lussian, al simpri biel lei i tiei scrits. La conte e je propit gustose. Cun di plui mi à fat ricuardâ tancj agns indaûr, cuant che di un cjarsár le ai pojade ancje jo. In plene gnot cun amîs o jeri lât, intun vignâl convintv che che nissun al podes nacuarzisi di no. Ed invezit, apene parsore il cjariesâr, une pile e jere pontade cuntri di no. E intant chei miei amîs e scimpavin vie, cul paron che ur coreve daùr, jo spaûrit e cun tant mâl di panze o ai scugnût liberami, sentât suntunne farmacie di chel stesso cjariesâr.

  • suntune ramace…..

Leave a Reply to Gelo Stellato Cancel reply

This site uses Akismet to reduce spam. Learn how your comment data is processed.

Site Footer