Gnovis stradis

L’assessôr D.F. al jere vistût di assessôr. Golarine blu, cjamese blancje, ocjaluts taronts e cjavei pene pene dispetenâts, come chei di une persone che e á tant cefâ e che duncje e pues dedicâ dome chel tant di timp a ogni cuestion. L’assessôr al jere de maiorance, che in chês ultimis elezions e jere rivade a cjapâ su cetancj vôts, ancje se – e no jere une robe gnove – e veve pontât il grues de campagne eletorâl dome su la pôre de int.
La sigurece e jere la necessitât plui sintude, in cheste societât simpri plui debule, menaçade e in pericul. Intai incuintris cu la int i politics a cirivin di sameâ personis fuartis, cence dubis, prontis a cjapâ in man la situazion, e intal stes timp personis comuns – che no cjatin mai parcament, come ducj, che a van in glesie a Nadâl, come ducj, e che a van a fa spesis al centri comercial, come ducj. Personis dongje de int. Ducj a disevin che la int no si ricognòs intai professôrs, che e samee che a sepin simpri dut lôr, e no si ricognòs nancje in chês personis che a lavorin tant (o cussí a disin!) par cualchi ideâl. La int e á gust di mangjâ fûr ogni tant e di fâsi un zîr pes buteghis, e di podê dî dut ce che e pense. Ce gust isal a jessi democratics se no si pues dî ce dal diaul che si pense?
Ma tornin al assessôr D.F. vistût di assessôr, anzit di assessôr indafarât. Al sameave intal so element, devant de int, a presentâ il progjet de gnove strade. Dopo vê ringraziât il sindic pe ospitalitât, li, intal comun di C., al tacá a spiegâ la bontât dal progjet, che la Zonte e sostignive cun convinzion. “Fat o no fat, just o no just, nô o vin i finanziaments, e ancje biei consistents, duncje la strade si fasará”. Al disé propite cussí.
Al é di dî che l’assessôr D.F. nol viveve intal comun di C., e che duncje nol varès vût dongje cjase i lavôrs e nissun i varès taiât il cjamp par fâ passâ la gnove strade. Al é ancje di dî che un assessôr al á simpri tantis robis tal cjâf e nol pues pensâ aes necessitâts di ducj. E al é ancje di dî che simpri, di dutis lis bandis, prime o dopo a vegnin fûr i solits comitâts pal NO a cualsisei iniziative, che par dîle dute a án ancje rot lis scjatis. Al samee che no si podi fâ mai nuie, che cualchidun al é simpri scontent.
Ma il progrès al á di lâ indevant, no? Ju clamin NIMBY (Not In My BackYard, no intal gno zardin) chei che no án voie di viodi sdrumât il lôr pradut, il lôr teritori, e che duncje a refudin dutis lis iniziativis che cualchi assessôr indafarât al propon. Ancje di chescj al tabaiá l’assessôr D.F., par vuadagnâ un pocje di popolaritât framieç di chê int che e steve a scoltâlu ancjemó cidine ma che no si saveve ce che e varès dite dal progjet. “Quello dei comitati è un comportamento egoistico” al disé par talian, forsit cu la idee di jessi plui autorevul, “Non è giusto dire di no a priori, bisogna pensare al bene pubblico”.
Forsit al veve reson. Ma forsit no. Ae fin, se ducj i tignissin veramentri al lôr teritori e a vessin cure di lui, e se lu difindessin di dutis lis ideis che cualchidun al á pensat, sentât in cualchi ufici lontan, no saressial miôr? No saressial miôr se no esistessin plui zonis che a án di jessi sacrificadis “pal ben public”? Se si cirissin… gnovis stradis?

di Margarite Cogôi

#811