Chel di Gonars

Un lunis di matine Jacum i dîs a la sô femine:
– Sante, jo cumò o voi vie. Se al ven chel di Gonars, tu âs di dîi che jo lu spieti devant dal domo di Palme a misdì.
– Sì.
– Âstu capît?
– Sì, sì.
– Se al ven chel di Gonars, tu i disis che Jacum lu spiete a Palme devant dal domo.
– Sì.
– A ce ore?
– A misdì.
– Bon.
Al pronte il cjaruç, al tache il mus, po al torne in cjase.
– Sante, se al ven chel di Gonars, tu as di dîi che jo lu spieti a Palme li dal domo, a misdì. Âstu capît ben?
– Sì.
– Ripet.
– Se al ven chel di Gonars o ai di dîi che tu lu spietis a Palme.
– A ce ore?
– A misdì.
– Dulà?
– Devant dal domo.
– Brave. No stâ a dismenteâti, eh!
Al monte sul cjar, gjie, al partìs.
Nol à fat cincuante metris che al si sint a clamâ:
– Jacum, Jacum!
Al ferme il mus, al cjale indaûr, e je la femine, dute sbirlufide che i cor incuintri, sfladade.
– Ce ise cumò?
– Jacum…?
– E alore?
– Jacum… e se nol ven chel di Gonars?
In Asie o intes Americhis e inta chei altris continents, Jacum nol podeve sigurâlu, ma in Europe, sì, in Europe al jere sigûr!
– Sante… tu sês la femine plui stupide d’Europe!

di Laurin Zuan Nardin

#805

2 comments On Chel di Gonars

  • Ma no vino di scomençâle ben la setemane? Si ve po! E noaltris de ostarie vuê o metìn sù no une ma dôs contis, e ce no isal di miôr che une conte par fâsi une ridade? Ispirade al Jacum plui nomenât dal Friûl, vele chi, une curtissime di Laurin Zuan Nardin che nus stice a molâ une ridade di gust, cence tantis nainis e pensîrs. Di lei intun flât e vie!

  • Benpo, benpo Laurin tu sês fuart e avonde, purtrop o varai di domandati i damps,e cumô ti spieghi il parcè, intal lei l’ ultin toc de to conte mi è partide une ridade come un colp di sclope, il cjan che mi durmive sot i pîts al petâ un salt di pore fûr dal balcon rompint i veris di tignude. Se no fos che le conte je cussi areose ti vares domandât i damps. Simpri in gjambe lis tôs contis. Lussian

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît