E magari, dopo, su la Tiere e vignarà sù une cualchi creature mancul stupide dal om!!!!! Brâf Checo!
Il Canocjon
Cun sigurece nissun al saveve ce dal diaul che al faseve: cualchidun lu etichetave come poete, par di altris al jere un un tic “fûr des riis”, ma ancjemò di altris lu difindevin cun: ” Un mone nol è par ciert, a mi mi nd à fât l’implant de corint eletriche in cjase cun la “piattina”(la novitât plui moderne in chei agns). Po di fat chel longjilini, une vore longjilini e sec di om, si presentave a cjase di Vigji cuntun o ancje doi volums de enciclopedie Treccani. Ju dave in pegn e Vigji al sperave simpri che nol tornàs cui solts par riscatâju. Pal nono Vigji e so nevôt al jere il scomençament di un viaç par lunc e par larc jenfri chês figuris, chei cuadris di un mont maraveôs di sience e nature cun colôrs e dissens di gjavâ il flât di cetant biei che a jerin! Cualsisei curiositât di nemâi, plantis, cîl, aghe, tiere, minerâi e no sai cetantis altris maraveis, dutis a deventavin, pal frut, prât indulâ passonâ la sô fantasie e la sô voie di cognossi il mont che fintremai di piçul lu inmagave. Cjâf bas su lis pagjinis, il nono dongje di lui, e in ducj doi la cidine sperance che Canocjon nol vignidi a riscatâ i volums. Intant che al svualave jenfri ches pagjinis di sium il frut a si diseve di bessôl: “Cuant che o sarai grant mi plasarès tirâ sù chestis razis, viodi i lôr piçui, gjoldimai cui voi e viodiju a cressi dì par dì. E rivave, purtrop, la dì che Canocjon al tornave a cjoli il volum e daspò il frut al spietave cun impazience e speranze la dì che al tornàs di gnûf cuntun altri numar de enciclopedie. Il frut nol podeve savê che inte cjase di Canocjon une frutine e spiçave lis orelis par scoltà il dialic a vôs basse jenfri la sô mame e il barbe. La mari de frute e murmuiave, businantii al fradi: “Crodistu che no lu sepi indulà che tu vâs… là di chês…” Une smicjade al spieli, alçant lis spalis, une cjarece ai cjavei lustris di brilantine e vie fûr di cjase, cun chê ande sganderlete di chês gjambis une vore lungjiis, forsit lis plui lungjiis dal paîs… La cjaminade atletiche viers, forsit, la “destinazion paradîs”…chel paradîs che la leç Merlin e à fât sierâ…
di Barbara Battel
cul piç di Luciano Marinig
#794
3 comments
Lasse une rispueste
Dutis lis contis
E cheste invezit e je la storie di un altri Vigji. Une storie che no si capìs ben di ce bande che e va, cun dentri la nostalgjie pes enciclopediis vieris e lis vitis normâls ma misteriosis, che ogni tant si cjatin ancje tai paisuts… Da rest… altris timps.
Cence volelu al è colât il stes non;Vigji. D’accordo cun Barbara di fa une conte partecipade su di un personaç cu lis stessis carateristichis stravagantis, il personaç sielt di Barbara oltri savê doprâ il fîl di lûs, impegnave vîf interes su le sience enciclopediche, no disdegnant le culture riprodutive a nivel di prove , tant condanade di so sûr. Biele e simpatiche conte cun tant di vêr intôr. Lussian
E brave Barbara. Al biel che tu judis Lussian a vinci la pôre di scrivi une conte. Lui al à brâf e di sigûr cu la to colaborazion al deventarà in cûrt une vere colone di Conteurte. Biele ancje la tô conte che us met sot i vôi cui che son i oms: di une bande la culture, di chê altre la passion. Chê benzine che môf dut il mont.