Un istant de nestre vite

Ce ise une fotografie, se no chel atim che a voltis al cjape dentri, come ch’al fos un lamp, le nestre vite, che po si davuelç  in chel riviel ch’a si sfante dulinvie tal nestri destin?
Une vite, chê di une frute di cuindis agns, a je come chê di in butul di une rose che e sta par vierzisi e e dà fûr une bielece e un odôr che nol à pari inte nature.
Le none Sunte, le ultime in bas a diestre inte foto, e je la plui zovine, e in ta chel scat che, faseit câs, e ten il dêt plui piçul di sô sûr Emma peât al so, a dimostrâ il ben che si volevin: un leam familiâr fuart, indissolubil.
Le istantanie cjapade dal 1911 e mostre nûf zovinis di Madrîs di Feagne che di li a poc a saressin partidis par lâ a fâ modons te perifarie di Budapest. Un lavôr za dûr pai oms, par lôr ancjemo di plui.
Jê, a 19 agns e varès maridât gno nono Nardìn, l’ultin Nardìn di une lungje schirie, che al varès dât il non ae famee dai “Nardins“.
E à dât al mont jenfri dôs vueris ben siet fiis, cence chei pierdûts dulinvie, po e à gjoldût di une sdrume di nevôts.
Chel timp ch’al è vignût plui indenant, dopo che istantanie che le viôt ritrate, al e stât il siò destin, o crôt che te sô vite e vedi ribaltât sù par jù une montagne, tant al e stât il so dedicâsi ae famee, ancje ai nevoduts, chei come me che i stevin simpri tai pîts.
Il mignestron de none Sunte al jere il miôr che si podeve mangjâ ator, mancjade je, di cussì bon no ‘nd  ài mai cerçât.
Jo le cjali, le rimiri, le ricuardi come che e fos une regjine, tal so puartament austeri, in chei voglons grancj, te sô gjenerositât di lavoradore cence misure, sigûr come che o soi che alc di jê al e ancje dentri di me ore presint.

Gracie none Sunte. Le vite o savìn e je un istant, come ch’al fos un colp di ale di une pavee, che dut vie chest, jo e te o vin prontece che al po durâ par simpri come il ben co si sin volûts.

di Maurizio Di Fant

1 coments On Un istant de nestre vite

  • Un ricuart, cuasi un omaç, une declarazion autentiche e sincire di un nevôt a une none che no je dome une none, ma je une intere ete di faturis, e fuarce, e vite, che aromai a somein dismenteadis, ma che in chê volte a jerin la norme. Nus al à veve lassade il nestre Marizio Di Fant che nus veve regalât, in chê volte dal contecurte day 2017 ancje la bielissime fotografie che e ven a metisi dongje a lis sôs peraulis. In gare la foto no si podeve viodi, ma cumò sì. Penulteme conte di chel Contecurte day, fat in chel di Flambri, vignût benissim. Dute di lei, magari cun mieç grop tal cuel par chei che la none no le àn dismenteade.

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît